Jalna Crime : दादागिरी वाढली; दुकानात घुसून व्यापाऱ्यावर हल्ला, पैसे मागत केले वार

अक्षय शिंदे 
जालना : दिवसाढवळ्या सर्रासपणे दादागिरी वाढली आहे. भर रस्त्यावर हल्ल्याच्या घटना घडत असताना लहान मुलांचा देखील यात सहभाग वाढत चालल्याचे पाहण्यास मिळत आहे. अशीच घटना जालना शहरात घडली असून अल्पवयीन मुलांनी दुकानात प्रवेश करत व्यापाऱ्याकडे पैशांची मागणी करत थेट कोयत्याने वार करत जखमी केल्याची घटना घडली आहे. या घटनेने परिसरात खळबळ उडाली आहे. 

जालना शहरातल्या कडबी मंडी या भागात सदरची घटना घडली आहे. सायंकाळच्या सुमारास घडलेल्या या घटनेत ४ अल्पवयीन मुले दुकानात घुसली. यामध्ये एकाच्या हातात कोयता होता. हत्यार सोबत ठेवत त्याने व्यापाऱ्याकडे पैसे देण्याची मागणी केली. मात्र यावेळी व्यापारी व दुकानातील कर्मचाऱ्यांनी त्याला पैसे देण्यास नकार दिला. यातून त्या मुलाने व्यापाऱ्यावर कोयत्याने वार करण्यास सुरवात केली. तीन वेळा वार करत त्याने या व्यापाऱ्याला जखमी केले. 

घटना सीसीटीव्ही कॅमेरात कैद 

सदर घटनेत व्यापाऱ्याच्या पोटाला वार लागून ते जखमी झाले आहेत. कोयत्याने वार करत असताना आरोपीचा सगळा प्रकार सीसीटीव्ही कॅमेऱ्यामध्ये कैद झाला आहे. यामध्ये एकजण कोयत्याने वार करत असून व्यापाऱ्याने त्याला पकडण्याचा प्रयत्न केला असता तो दुकानाबाहेर पडला. यानंतर काही लहान मुले दुकानात घुसून वस्तू फेकून मारत असल्याचे दिसून येत आहे. 

पोलिसात गुन्हा दाखल 

दरम्यान घडल्या प्रकाराने परिसरात खळबळ उडाली असून घटनेत व्यापारी जखमी झाला आहे. याप्रकरणी जालना शहरातल्या सदर बाजार पोलिस ठाण्यात गुन्हा दाखल करण्यात आला आहे. पोलिसांनी घटनेची माहिती घेत सीसीटीव्ही फुटेजची तपासणी केली आहे. यावरून हल्ला करणाऱ्यांचा शोध सदर बाजार पोलीस घेत आहेत.