नाशिक, अमरावतीनंतर आता जालन्यात अकरावीच्या मुलीवर अत्याचार; बुरखा घालून घरी न्यायचा अन्...

अक्षय शिंदे पाटील, जालना प्रतिनिधी

11th Standard Girl Assault : नाशिकमधील आयटी कंपनीतील धर्मांतर प्रकरण आणि अमरावतीतील लैंगिक शोषणाच्या प्रकारामुळे राज्यात संतापाची लाट आहे. हे प्रकरण ताजे असतानाच आता जालन्यातही एक धक्कादायक घटना समोर आली आहे. अकरावीत शिकणाऱ्या एका महाविद्यालयीन तरुणीला प्रेमाच्या जाळ्यात ओढून साहिल अन्सारीने तिच्यावर बलात्कार केला. आत्महत्या करण्याची धमकी देत साहिलने तिच्यावर अत्याचार केल्याचे उघडकीस आले आहे. बिहारच्या साहिल अन्सारीकडून महाविद्यालयीन तरुणीवर वारंवार अत्याचार केल्याची संतापजनक घटना जालन्यात घडली आहे. आरोपी साहिल अन्सारीच्या विरोधात बलात्कार आणि अ‍ॅट्रॉसिटी कायद्यांतर्गत गुन्हा दाखल करण्यात आला आहे. पोलिसांनी त्याला बेड्या ठोकल्या असून पुढील तपास केला जात आहे.

तरुणीची ओळख लपविण्यासाठी आरोपी तिला बुरखा घालून घरी नेऊन तिच्यावर अत्याचार करत असे, असे पीडितेने तक्रारीत म्हटले आहे. याप्रकरणी जालना पोलिसांनी बिहारच्या साहिल अन्सारी नावाच्या तरुणाला अटक केली आहे. त्याच्या विरोधात बलात्कार आणि अ‍ॅट्रॉसिटी कायद्यांतर्गत गुन्हाही दाखल केला आहे. साहिल अन्सारी हा मुलीची ओळख पटू नये म्हणून रस्त्यावरून येता-जाताना तिला बुरखा घालायला लावत असल्याची माहिती पोलीस उपअधीक्षक अनंत कुलकर्णी यांनी दिली.

दरम्यान, या प्रकरणाचा पोलीस सर्व बाजूंनी तपास करत आहेत. शहरातील एका महाविद्यालयात प्रवेश घेतल्यानंतर झालेल्या ओळखीचे रूपांतर प्रेमसंबंधात झाले. त्यानंतर वारंवार शारीरिक संबंध ठेवून अत्याचार केल्याप्रकरणी कदीम जालना पोलिसांनी गुरुवारी एका संशयिताला अटक केली आहे. साहिल अन्सारी (रा. बिहार, सध्या मिल्लतनगर, जालना) असे संशयिताचे नाव आहे.

शहरातील अंबड चौफुली ते छत्रपती संभाजीनगर बायपास मार्गावरील एका महाविद्यालयात अकरावीत प्रवेश घेतल्यानंतर साहिल अन्सारी आणि पीडितेची ओळख झाली होती. या ओळखीचे रूपांतर प्रेमात झाले. त्यानंतर साहिलने पीडितेला वेगवेगळ्या ठिकाणी नेऊन तिच्याशी शारीरिक संबंध ठेवले. पुढे संशयिताकडून सतत शारीरिक संबंध ठेवण्याची मागणी वाढत गेल्याने पीडितेने हा प्रकार आपल्या पालकांना सांगितला. त्यानंतर कदीम जालना पोलीस ठाण्यात पीडितेने तक्रार दिली. या तक्रारीवरून साहिल अन्सारी याच्याविरुद्ध बलात्कार तसेच अ‍ॅट्रॉसिटी कायद्यांतर्गत गुन्हा दाखल करण्यात आला. पोलिसांनी साहिल अन्सारी याला गुरुवारी ताब्यात घेतले. या प्रकरणाचा तपास उपविभागीय पोलीस अधिकारी अनंत कुलकर्णी करत आहेत.