Jalna Crime News: शेतात सोन्याने भरलेले सात हंडे! कुंकू, लिंबू, नारळ सोन्यासाठी शेतात अघोरी पुजा; जालन्यातील धक्कादायक प्रकार

अक्षय शिंदे पाटील, प्रतिनिधी

जालना जिल्ह्यात सोन्याने भरलेले सात हंडे असल्याचा संशय व्यक्त करत ते शोधण्यासाठी शेतात अघोरी पूजा केल्याचा प्रकार समोर आलाय. टकले पोखरी गावातील शेतशिवारात हा प्रकार घडला. याप्रकरणी परतूर पोलिसांनी शेतमालकासह नऊ जणांना ताब्यात घेतले असून त्यांच्याविरोधात गुन्हा दाखल केला आहे. 11 नोव्हेंबर रोजी रात्रीच्या सुमारास पोलिसांनी ही कारवाई केली.

टकले पोखरीमधील शिवलाल धोंडीराम राठोड यांनी आपल्या शेतात सोन्याने भरलेले सात हंडे असल्याचा संशय व्यक्त केला होता. हे हंडे शोधण्यासाठी त्यांनी अहिल्यानगर, छत्रपती संभाजीनगर आणि जालना जिल्ह्यातील काही लोकांना शेतात बोलावलं होतं. त्यानंतर हे सर्वजण शेतात अघोरी पूजा करण्यासाठी आले होते.

पोलिसांना मिळाली गुप्त माहिती

दरम्यान रात्री गस्तीवर असलेल्या पोलिसांना याबाबत गुप्त माहिती मिळाली. त्यानुसार पोलिसांनी घटनास्थळी जाऊन उपस्थित लोकांची विचारपूस केली आणि झाडाझडती घेतली. यावेळी पूजेसाठी आणलेले लिंबू, नारळ, सुपारी, बदाम आणि कुंकू असे साहित्य पोलिसांनी जप्त केले. या तपासणीनंतर संपूर्ण प्रकार उघडकीस आला.

या प्रकरणी महाराष्ट्र जादूटोणा प्रतिबंधक अधिनियम आणि भारतीय दंड संहितेनुसार गुन्हा दाखल करण्यात आला आहे. शेतमालकासह नऊ आरोपींना पोलिसांनी ताब्यात घेतले असून या प्रकरणाचा पुढील तपास परतूर पोलीस करत आहेत.