Bhusawal News : विजेचा झटका लागून वायरमन खांबावरून कोसळला; दुरुस्तीचे काम करताना घडली दुर्घटना

भुसावळ (जळगाव) : विजेच्या खांबावर दुरुस्तीचे काम करण्यासाठी वायरमन खांबावर चढला होता. काम करत असताना विजेचा जोरदार झटका बसून वायरमन खांबावरून खाली कोसळला. यामुळे गंभीर जखमी झाल्याची घटना वरणगाव येथे घडली. दैव बलवत्तर म्हणून तरुणाला केवळ दुखापत झाली आहे.

वरणगाव (Varangaon) येथे घडलेल्या घटनेत रोशन निवृत्ती चौधरी (वय ३०) हा गंभीर जखमी झाला आहे. रोशन चौधरी हा बाह्यस्त्रोत कर्मचारी वायरमन नदिम बादशहा काझी (वय ३१) यांच्यासह खिडकी वाडा डिपीवर काम करीत होते. यावेळी खांबावर काम करत असताना विद्युत प्रवाह बंद होता. मात्र इन्व्हर्टरच्या रिटर्न करंटचा जोरदार झटका (Electric Shock) रोशनला बसला. यामुळे खांबावरून खाली पडला. 

खांबावरून खाली पडल्याने रोशन चौधरी यांच्या उजव्या हाताला जबर मार लागून हात फॅक्चर झाला आहे. घटनेनंतर रुग्णालयात दाखल करण्यात आले असून खाजगी रुग्णालयात उपचार सुरु आहेत. दरम्यान वीज पुरवठा खंडित असल्यावर सुद्धा इन्व्हर्टरचा बॅक करंट खांबावर येत असतो. यामुळेच सदरची घटना घडली असल्याची शक्यता वर्तविली जात आहे.