Jalgaon News: पत्‍नीच्‍या मृत्‍यूने होता तणावात; विरहात पुलावरून मारली उडी

जळगाव : फुलपाट टाकळी (ता. धरणगाव) येथील ३० वर्षीय तरुणाने बांभोरी गावाजवळील गिरणा नदीच्या (GIrna River) पुलावरून गुरुवारी (ता. ६) सायंकाळी उडी घेऊन आत्महत्या केली. फुलपाट ग्रामस्थांनी मृतदेहाची ओळख (Jalgaon News) पटविली असून, श्याम प्रताप भिल (वय ३०) असे मृत तरुणाचे नाव आहे. (Tajya Batmya)

श्याम भिल हा त्याचा भाऊ भुरा भिल याच्यासोबत राहत होता. तो वाळूच्या ठेक्यावर काही महिन्यांपूर्वी काम करीत होता. पत्नीच्या मृत्यूनंतर श्याम भिल तणावात होता. त्यामुळे गुरुवारी बांभोरीजवळील पुलावरून त्याने थेट गिरणा नदीपात्रात उडी घेतली. पुलावरून उडी घेण्यापूर्वी प्रत्यक्षदर्शी दोघांनी त्याला हटकले होते. मात्र, आत्महत्येचा निर्धार पक्का असल्याने त्याने त्यांच्या बोलण्याकडे दुर्लक्ष करून पुलावरून थेट उडी घेतली. हा प्रकार वाहनधारकांच्या लक्षात आल्यानंतर त्यांनी घटनास्थळी धाव घेतली.

बांभोरी येथील ग्रामस्थांनी पोलिसांना कळविले. त्यानंतर पोलिस उपनिरीक्षक नयन पाटील, सहाय्यक फौजदार अनिल फेंगडे, चेतन पाटील, होमगार्ड अशोक वाघ यांनी मृतदेहाचा पंचनामा करून जिल्हा शासकीय वैद्यकीय महाविद्यालयात रवाना केला. नदीपात्रातच वाळू ठेक्यांवर काम करीत असल्याने श्याम भिल यांची ओळख वाळू व्यवसायिक, वाहतुकदारांनी पटविली व पोलिसांना माहिती दिली. त्यावरून पोलिसांनी ग्रामस्थांना बोलावून त्याची खात्री करून घेतली.