Jalgaon: लाखावर जाणार चांदी; दिवसभरात दीडशे किलोपर्यंत होतेय विक्री

जळगाव : सध्या लग्नसराई नसली तरी सोन्यापेक्षा चांदीचे दागिने व चांदीला ग्राहकांकडून मोठी मागणी सुरू झाली आहे. आगामी काळात चांदीचे दर प्रतिकिलो एक लाखाच्यावर जाणार असल्याचा अंदाज सोने (Gold) बाजारात व्यक्त केला जात आहे. यामुळे रोज पन्नास- साठ किलोने विकली जाणारी चांदी (Silver) अचानक दोन दिवसांपासून शंभर ते दीडशे किलोपर्यंत विकली जात आहे. (jalgaon news Silver price to go to one lakhs)

पैशांची अडचण (Jalgaon) असली, की घरातील सोने, चांदी विकून पैसे करून घेण्याकडे अनेकांचा कल असतो. यामुळे अनेक जण सोने, चांदीत गुंतवणूक करतात. दर कमी झाले, की सोने-चांदी घेतात आणि भाव वाढले, की विकतात. यामुळे खरेदी-विक्री दरतील फरक म्हणजे त्यांचा नफा असे गुंतवणूकदारांचे गणित असते. काही दिवसांपासून चांदीचे दर एक लाख प्रतिकिलो जातील, असा अंदाज सोने बाजाराने (Gold Market) वर्तविला आहे. यामुळे नागरिकांची चांदीला मागणी वाढली आहे.

फायद्याच्‍या आशेने खरेदी वाढली

शहरासह जिल्ह्यातील सराफी दुकानात अचानक चांदीला मागणी वाढणी असल्याचे व्यावसायिक सांगतात. सध्या चांदीचा दर ६४ हजार प्रतिकिलो आहे. तोच दर जर एक लाखावर गेला, तर तेवढाच फायदा या आशेने ग्राहक चांदी खरेदी करीत आहे.