कन्नड घाटात वसुली करणारे ते पोलिस कर्मचारी निलंबित

जळगाव : चाळीसगावच्या (Chalisgaon) कन्नड घाटात नाकाबंदी दरम्यान वाहन चालकांकडून वसुली करणाऱ्या चार पोलिस कर्मचाऱ्यांना निलंबित करण्यात आले आहे. तसे आदेश जिल्‍हा पोलिस अधीक्षक डॉ.प्रवीण मुंडे यांनी शनिवारी काढले आहेत. चाळीसगावचे आमदार मंगेश चव्हाण (MLA Mangesh Chavan) यांनी ट्रक चालकाच्या वेशात या वसुली पोलिसांचा पर्दाफाश केला होता.

अवजड वाहनांना बंदी असताना कन्नड घाटात नाकाबंदी करत प्रत्येक ट्रक चालकांकडून जशी जमेल तशी वसुली करणाऱ्या चाळीसगाव ग्रामीण पोलिस ठाण्याच्या पोलिस कर्मचाऱ्यांवर निलंबनाची कारवाई करण्यात आली आहे. आमदार मंगेश चव्हाण यांनी स्टिंग ऑपरेशन करून या चौघांचा व्हिडिओ पोलिस अधीक्षक डॉ. मुंडे यांना टाकला हेाता. खातेंतर्गत चौकशी सुरु असून चौघांच्या निलंबनाचे आदेश शनिवारी काढण्यात आले आहेत.

यांचे झाले निलंबन

गणेश वसंत पाटील, प्रकाश भगवान ठाकूर, सतीश नरसिंग राजपूत, संदीप भरत पाटील असे केलेल्या पोलिस कर्मचाऱ्यांची नावे आहेत. निलंबन काळात चौघे कर्मचारी खासगी नोकरी, व्यवसाय करू शकणार नाहीत, असे आदेशात म्हटले आहे.