अनोखी ऑक्सिजन बँक..२१ एकरात दीड हजार वटवृक्षांची लागवड

जळगावः कोरोना काळात ऑक्सिजनचे महत्‍त्‍व सर्वांनाच समजून चुकले आहे. ऑक्सिजन अभावी अनेकांचा जीव गेला असल्‍याने ऑक्सिजन सिलेंडरसाठी मोठी कसरत करावी लागत होती. परंतु, जळगावात निसर्गाच्‍या सानिध्‍यातील अनोखी अशी ऑक्सिजन बँक उभारली जात असून २१ एकर खाजगी जागेत दीड हजार वडांच्या झाडाच्या लागवडीतून हा पहिलाच प्रकल्प उभारला जात आहे. (jalgaon-news-Planting-of-one-and-a-half-thousand-banyan-trees-in-21-acres)

सुबोनियो केमिकल्स लिमिटेड व मराठी प्रतिष्ठान जळगावतर्फे शहरापासून 15 की.मी. अंतरावर असलेल्या गाडेगावजवळ हा प्रकल्‍प साकारला असून याचा शुभारंभ रविवारी (ता.१९) झाला. यावेळी जिल्‍हा पोलिस अधिक्षक डॉ. प्रविण मुंढे, मनपा आयुक्‍त सतीश कुलकर्णी यांच्‍यासह सुबोनियो केमिकल्‍स लि. व मराठी प्रतिष्‍ठानचे पदाधिकार हजर होते.

दीड महिन्‍यांपासून सुरवात

जळगावपासून १५ किमी अंतरावरील खासगी जागेवर हा प्रकल्‍प उभारला जात असला तरी परिसरातील नागरीकांना भविष्‍यात याचा निश्‍चीतच उपयोग होणार आहे. एकवीस एकर जागेत 1500 वडांच्या झाडांच्या लागवडीचा प्रकल्प साकारला जात असून, साधारण महिन्‍यांपासून या प्रकल्‍प उभारणीला सुरवात झाली आहे. निसर्गाच्‍या सानिध्‍यातील ही वटवृक्षांची ऑक्सिजन बँक जळगावकर व परिसरातील नागरीकांनासाठी संजीवनी ठरणार आहे.