पारोळ्यात जाळला आमदार राणेंचा पुतळा; गुन्‍हा दाखल करण्याची मागणी

पारोळा (जळगाव) : जिल्ह्याचे पालकमंत्री तथा पाणी पुरवठा व स्वच्छता मंत्री नामदार गुलाबराव पाटील यांच्‍याविषयी आमदार नितेश राणे यांनी अपशब्द वापरले. याचा जळगाव जिल्हा व पारोळा तालुका शिवसेनेतर्फे निषेध करत पारोळा पोलिसात आमदार राणे विरुद्ध गुन्हा दाखल करण्याची मागणी शिवसेना जिल्हाप्रमुख डॉ. हर्षल माने यांनी करून पारोळा पोलिसात पदाधिकाऱ्यांसह निवेदन देण्यात आले. (jalgaon-news-MLA-nitesh-Rane-statue-burnt-in-Parola-shiv-sena-Demand-for-filing-a-case)

पालकमंत्री गुलाबराव पाटील यांच्‍याबद्दल अपशब्‍द वापरल्‍याचा जिल्‍ह्यात तिव्र निषेध केला जात आहे. यात पारोळा येथे सहाय्यक पोलीस निरीक्षक रवींद्र बागुल यांना जळगाव जिल्हा शिवसेना व पारोळा तालुका शिवसेनेतर्फे निवेदन देऊन आमदार नितेश राणे यांचा निषेध व्यक्त करण्यात आला. यावेळी शिवसेना जिल्हाप्रमुख डॉ. हर्षल माने, तालुका प्रमुख प्रा. आर. बी. पाटील, शहर प्रमुख अशोक मराठे, आबा महाजन, सावण शिंपी, माजी नगरसेवक राजू कासार, तालुका समन्वयक युवासेना चेतन पाटील, समाधान मगर, माजी नगराध्यक्ष चंद्रकांत पाटील, किरण पाटील, अमोल पाटील, जगदीश पाटील, सतीश पाटील, अशोक कापडणे, राजू जावरे यांच्यासह पदाधिकारी उपस्थित होते.

महामार्गावर आमदार राणेंचा पुतळा जाळून निषेध

जिल्ह्याचे पालकमंत्री यांच्याबद्दल अपशब्द वापरल्याने संपूर्ण महाराष्ट्रात शिवसैनिक निषेध व्यक्त करत असून महामार्गावर आमदार नितेश राणे यांचा प्रतिकात्मक पुतळा जाळला. यावेळी जय भवानी जय शिवाजी अशा घोषणा देत आमदार राणेंवर गुन्हा दाखल करण्याची मागणी शिवसैनिकांनी केली.