Jalgaon : मासेमारीसाठी गेलेल्या इसमाचा तलावात बुडून मृत्यू; जळगावच्या मेहरूण तलावातील घटना

जळगाव : जळगाव शहरालगत असलेल्या मेहरूण तलावात काहीजण मासेमारी करण्यासाठी जात असतात. त्यानुसार मासेमारी करण्यासाठी गेलेल्या एका इसमाचा बुडून मृत्यू झाल्याची घटना उघडकीस आली. यामुळे परिवारावर दुःखाचा डोंगर कोसळला आहे. या प्रकरणी एमआयडीसी पोलिस ठाण्यात आकस्मिक मृत्यूची नोंद झाली आहे. 

जळगाव शहरातील मेहरूण परिसरामधील फातिमा मशिदीजवळ वास्तव्यास असलेले काझी अब्दुल वाहीद रईस अहमद (वय ४५) असे मृत प्रौढाचे नाव आहे. त्यांच्या मागे आई, पत्नी असा परिवार आहे. काझी अब्दुल हे मशिदीत काम करून परिवाराचा उदरनिर्वाह करीत होते. दरम्यान ३० सप्टेंबरला दुपारी ते जवळच असलेल्या मेहरूण तलावात मासेमारी करण्यास गेले होते. मासेमारी करत असताना अचानक त्यांचा तोल जाऊन पाण्यात पडले. 

बाहेर निघता न आल्याने बुडून मृत्यू 

तलावाच्या खोल पाण्यात पाडल्यानंतर काझी अब्दुल यांना बाहेर निघता आले नाही. तसेच त्यांच्या जवळ कोणी नसल्याने त्यांना मदत देखील मिळाली नाही. यामुळे ते पाण्यात बुडाले. दरम्यान अब्दुल हे सायंकाळ होऊन देखील घरी आले नसल्याने कुटुंबीय चिंतेत सापडले होते. यामुळे त्यांचा परिवाराने त्यांचा तलाव व आजूबाजूच्या परिसरात शोधाशोध केली. मात्र ते आढळून आले नाही. 

दुसऱ्या दिवशी सापडला मृतदेह 

दरम्यान, बुधवारी सायंकाळी तलाव परिसरात असलेल्या काहींना त्यांचा मृतदेह तलावात तरंगताना आढळून आला. याबाबत पोलिसांना माहिती देण्यात आली असता पोलिसांनी घटनास्थळी धाव घेऊन शासकीय वैद्यकीय महाविद्यालय व रुग्णालयात मृतदेह पाठविला. रुग्णालयात नातेवाइकांनी एकच आक्रोश केला. रुग्णालयात समाजातील विविध मान्यवरांची उपस्थिती होती. एमआयडीसी पोलिस ठाण्यात आकस्मिक मृत्यूची नोंद झाली आहे.