कोजागिरी : अतिरिक्त दोन लाख लिटर दुधाची मागणी

जळगाव : कोरोना संसर्ग कमी झाल्याने यंदा कोजागरी पौर्णिमा साजरी करता येत आहे. त्यामुळे दुधाची मोठी मागणी आहे. यात जिल्हा दूध संघाच्यावतीने अतिरिक्त दुधाचे नियोजन केले आहे. दुधाच्या एका लिटरला 60 ते 70 रुपये दर आहे. (jalgaon-news-Kojagiri-Demand-for-additional-two-lakh-liters-of-milk)

कोजागिरी पौर्णिमा आज (ता.19) साजरी करण्यात येत आहे. त्यानिमित्ताने दूध बाजारात दुधाची खरेदी- विक्री मोठ्या प्रमाणात होते. शहरातील मिठाई विक्रेते, किरकोळ विक्रेते; तसेच केटरिंग व्यावसायिक दूध बाजारातून खरेदी करतात. गतवर्षी कोरोनाच्या संसर्गामुळे सार्वजनिक ठिकाणी कोजागरी पौर्णिमा साजरी करण्यास परवानगी नव्हती. त्यामुळे अनेकांच्या उत्साहावर विरजण पडले. मात्र गेल्या दोन ते तीन महिन्यांपासून कोरोनाचा संसर्ग कमी झाल्याने निर्बंध शिथिल झाले आहेत. त्यामुळे यंदा कोजगिरी साजरी करता येणे शक्य आहे. परिणामी दुधाला मागणी वाढली आहे.

मागणीनुसार दूधाचा पुरवठा

जिल्हा दूध संघांकडून नियमित दीड लाख लीटरचा पुरवठा केला जातो. कोजागिरीच्या पार्श्वभूमिवर बाहेरील जिल्हयांमधून दूधाची मागणी असल्याने दूध संघांकडून अतिरिक्त दोन लाख लीटर दूधाचा पुरवठा केला जाणार आहे. मागणीनुसार दूधाचा पुरवठा केला जाणार आहे.

खासगी डेअरी चालकांकडून वाढीव मागणी

जिल्हा दूध संघासह खासगी डेअरी चालकांनी देखील अतिरिक्त दुधाचे नियोजन केले आहे. शहरातील खाजगी डेअरींमध्‍ये दररोज साधारणपणे १ हजार लिटर दुधाची विक्री होत असते. मात्र कोजागरी निमित्ताने ही मागणी दीडपट अधिक होत असते. यामुळे खाजगी डेअरीमधून देखील तीन हजार लिटरपर्यंत दुधाचा अतिरिक्त पुरवठा करण्यात येणार असल्याचा अंदाज आहे.