कुटुंबप्रमुखाचा मृत्यू; पत्नी, दोघे मुले अत्यवस्थ, गरिबीमुळे घेतले विष

भुसावळ (जळगाव) : हाताला रोजगार नसल्याने गरिबीला कंटाळलेल्या येथील रिक्षाचालकाने पत्नी व दोघा मुलांसह विषारी औषध सेवन करून आत्महत्येचा प्रयत्न केल्याची घटना शुक्रवारी (ता. १०) प्रेरणानगरात उघडकीस आली होती. तेव्हापासून त्यांच्यावर रुग्णालयात उपचार सुरू होते. मात्र, उपचारादरम्यान, कुटुंबप्रमुख विलास भोळे (वय ६०) यांचा मंगळवारी (ता. १४) मृत्यू झाला. (jalgaon-news-family-poison-Death-of-head-of-family-Wife-and-two-children-in-critical-condition)

भुसावळ शहरातील प्रेरणानगरातील विलास प्रदीप भोळे (वय ६०) हे पत्नी, मुलगा व घटस्फोटीत मुलीसह वास्तव्यास होते. गेल्या दोन वर्षांपासून सुरू असलेल्या लॉकडाऊनमुळे व्यवसाय चालेनासा झाल्याने भोळे घरीच थांबून होते. त्यातच पत्नीला रक्तदाब, मधुमेह आदी आजारांनी ग्रासल्याने उपचाराचा खर्च वाढला होता. शिवाय, बेरोजगार असलेला मुलगा व मुलीचा दोन वेळा विवाह झाल्यानंतरही घटस्फोट झाल्याने कुटुंबात नैराश्याचे वातावरण निर्माण झाले होते. उत्पन्नाचे साधन नसल्याने प्रपंच चालवणे अवघड झाल्याने या कुटुंबाने सामूहिकरीत्या गुरुवारी सायंकाळी विषारी औषध घेत आत्महत्येचा प्रयत्न केला होता. याची माहिती मिळताच पोलिसांनी वेळीच धाव घेत कुटुंबीयांना उपचारार्थ दाखल केले होते.

पत्नी, मुले अत्यवस्थ

रिक्षाचालक विलास भोळे, त्यांच्या पत्नी लताबाई भोळे (५२), मुलगी प्रेरणा भोळे (२८), मुलगा चेतन भोळे (वय २७, सर्व रा. वांजोळा रोड, प्रेरणानगर) यांच्यावर स्थानिक खासगी रुग्णालयात उपचार केल्यानंतर जळगाव येथील शासकीय वैद्यकीय महाविद्यालयात उपचार सुरू होते. मंगळवारी (ता. १४) पहाटे सहाच्या सुमारास विलास भोळे यांची प्राणज्योत मालवली.