Eknath Khadse: पन्नास खोके घेतले, मग मंत्रिपद कशाला?; मुख्यंमंत्र्यांच्या प्रश्‍नाबाबत खडसेंचा गौप्यस्फोट

भडगाव (जळगाव) : ‘पन्नास खोके घेतले, मग तुम्हांला मंत्रिपद कशाला’ असे मुख्यमंत्री एकनाथ शिंदे जळगावातील मंत्रिपदासाठी लॉबिंग करणाऱ्या आमदारांना विचारतात असा गौप्यस्फोट माजी मंत्री तथा राष्ट्रवादी काँग्रेसचे आमदार एकनाथ खडसे (Eknath khadse) यांनी केला आहे. ते आज भडगाव (Bhadgaon) तालुक्यात कनाशी येथे राष्ट्रवादी काँग्रेसच्या जनसंवाद यात्रेच्या शुभारंभ प्रसंगी बोलत होते. (Jalgaon Eknath Khadse News)

राष्ट्रवादी काँग्रेसकडून (NCP) आजपासून पाचोरा-भडगाव मतदारसंघात जनसंवाद यात्रा सुरू करण्यात आली. महानुभाव पंथाची काशी म्हणून ओळखल्या जाणाऱ्या कनाशी गावापासून जनसंवाद यात्रेचा शुभारंभ झाला. माजी मंत्री डॉ. सतीश पाटील, गुलाबराव देवकर, जिल्हाध्यक्ष रवींद्र पाटील, (Amalner) अमळनेरचे आमदार अनिल पाटील, माजी आमदार दिलीप वाघ, प्रदेश प्रवक्ते योगेश डिसले आदी उपस्‍थीत होते.

गुलाबरावांनाही लगावला टोला

खडसे म्हणाले,‘ मंत्रिपदासाठी जिल्ह्यात रस्सीखेच सुरू आहे. आमदारांनी गाड्या भरून मुंबईत लॉबिंग केले. अपक्ष आमदारांसह अनेक जण मंत्रिपदासाठी इच्छुक आहेत, त्यामुळे तुम्ही पन्नास खोके घेतले ना, मग तुम्हांला मंत्रिपद कशाला असे मुख्यमंत्री एकनाथ शिंदे 'त्या' आमदारांना विचारतात. जे गुलाबराव आपल्या भाषणातून गद्दारी माझ्या रक्तात नाही, असे सांगायचे तेच गुलाबराव पाटील आता उद्धव ठाकरेंना अक्कल शिकवायला लागले आहेत; असा टोला त्यांनी लगावला. चौफेर टोलेबाजी करत शिंदे गटावर त्यांनी चांगलीच तोफ डागली.