Cyber Crime: पतंजली योगच्‍या नावे फसवणूक; फेसबुकवर बनावट जाहिरातीतून लाटले सव्वा लाख

धरणगाव (जळगाव) : फेसबुकवर पतंजली योगा प्रशिक्षणाची बनावट जाहिरात टाकून त्या जाहिरातीच्या माध्यमातून धरणगावच्या एकाची १ लाख १९ हजारात फसवणूक (Fraud) झाल्याची घटना उघडकीस आली आहे. याप्रकरणी धरणगाव (Dharangaon) पोलीस ठाण्यात दोन अज्ञात मोबाईल धारकांविरुद्ध गुन्हा दाखल करण्यात आला आहे. (Tajya Batmya)

धरणगाव शहरातील हेमइंदूनगरातील रहिवाशी प्राचार्य डॉ. किशोर मंगेश पाटील (वय ६०) हे परिवारासह वास्तव्यास आहेत. ७ ऑगस्ट २०२२ रोजी किशोर पाटील यांना फेसबुकवर (Cyber Crime) पंतजली योगपीठ ट्रस्ट युनिट २ हरीद्वार उत्तराखंड या संस्थेला योगासन व प्राणायाम ७ दिवसांच्या प्रशीक्षणाबाबत जाहीरात दिसली. सदर जाहिरातीत प्रशिक्षणासाठी पंतजली योगपीठ ट्रस्ट युनिट २ खाते नंबर (क्रं. १९०५१९०१९००५९६६५) टाकला होता.

टप्‍प्‍याटप्‍प्‍याने टाकले पैसे

प्राचार्य किशोर पाटील हे प्रशिक्षण करण्यास इच्छुक असल्यामुळे त्यांनी फोन पे द्वारे टप्याटप्याने एकूण १ लाख १९ हजार रुपये टाकले. श्री. पाटील एप्रिल महिन्यात प्रशिक्षण घेणार होते. मात्र त्या दरम्यान काही अडचण आल्यास पैसे परतीचे काय? याबाबत संपर्क साधल्यावर पैसे परत करण्यास टाळाटाळ व्हायला लागली. फसवणुक झाल्याचे लक्षात आल्यावर किशोर पाटील यांनी पोलिस निरीक्षक राहुल खताळ यांच्याशी संपर्क केला. त्यांच्या मार्गदर्शनाने सायबर क्राईमला संपर्क केला. सायबर क्राईमला बनावट खाते असल्याचा संशय व्यक्त केला आहे. पाटील यांनी धरणगाव पोलिस ठाण्यात तक्रार दिली आहे. याप्रकरणी गुन्हा दाखल करण्यात आला असून पुढील तपास पोलिस सब इन्स्पेक्टर अमोल गुंजाळ हे करीत आहेत.