मुलाचे अपहरण, पतीला मारण्याची धमकी देत विवाहितेवर अत्‍याचार

भुसावळ (जळगाव) : भुसावळ शहरातील विवाहितेला मुलाचे अपहरण व पतीला ठार मारण्याची धमकी देत अत्याचार केल्याची घटना उघडकीस आली. या विरोधात एकावर गुन्हा दाखल करण्यात आला असून त्‍यास अटक करण्यात आली आहे. (jalgaon-news-crime-news-bhusawal-married-women-threatening-kill-her-husband-and-child-incident)

भुसावळ शहरात तीस वर्षीय विवाहिता पती व मुलासह वास्‍तव्‍यास आहे. गतवर्षी २०२० च्या रमजान महिन्यापासून ते आतापर्यंत संशयित आरोपी शेख जमशेद शेख शमीम उर्फ जम्मूई याने विवाहितेला तिच्या मुलाचे अपहरण व पतीला ठार मारण्याची धमकी दिली. धमकी देत सदर महिलेवर दबाव आणून तिच्‍यावर वारंवार अत्याचार केले.

पतीने दिला धीर

मुलाच्या अपहरणाची व पतीस ठार मारण्याची धमकी दिली असल्याने तिने घाबरून त्यावेळी तक्रार केली नाही. परंतु तिच्या पतीने मनातील भीती दूर केली. यानंतर विवाहित महिलेने पोलिसात तक्रार दाखल केली. महिलेच्या फिर्यादीवरून संशयित आरोपी शेख जमशेद शेख शमीम याच्यावर भुसावळ बाजारपेठ पोलिस ठाण्यात गुन्हा दाखल करण्यात आला आहे. गुन्हा झाल्यानंतर संशयित आरोपीला अटक करण्यात आली.