कंत्राटमध्‍ये दाखविले वेगळे अन्‌ दिले दुसरेच कॉन्सन्ट्रेटर

जळगाव : जिल्ह्यातील भुसावळ, बोदवड व यावल ग्रामीण रुग्णालयांत १६ नग, न्हावी येथील ग्रामीण रुग्णालयात आठ नग, मुक्ताईनगर, जामनेर, चोपडा येथे प्रत्येकी १६ नग ऑक्सिजन कॉन्सन्ट्रेटर खरेदी करण्यात आले आहेत. मात्र संबंधित कंत्राटदाराने नमूद केलेल्या कंपनीऐवजी दुसऱ्याचे कंपनी ऑक्सिजन कॉन्सन्ट्रेटर पुरविली आहेत. या प्रकरणाची चौकशी करून सत्य बाहेर आणावे, अशी मागणी माहिती अधिकार कार्यकर्ते दिनेश भोळे यांनी जिल्हाधिकारी अभिजित राऊत यांच्याकडे केली आहे. (jalgaon-news-civil-fraud-Concentrators-paid-by-one-company-instead-of-another)

खासदार रक्षा खडसे यांच्या विकास कार्यक्रम २०२१-२२ अंतर्गत या खरेदीस मान्यता दिली आहे. गेल्या १८ जूनला जिल्हा रुग्णालय व प्रभंजन ऑटोमोबाईल यांच्यात झालेल्या करारपत्रानुसार ‘डेडाकज सिंगल किंवा ड्यूल आउटलेट ऑक्सिजन कॉन्सन्ट्रेटर १० लिटरचे, डीई-२ ए डब्ल्यू’ १२० नग खरेदी करण्यात आले आहेत. एकाची किंमत सव्वा लाख रुपये आहे. संबंधित कंत्राटदारास ऑक्सिजन कॉन्सन्ट्रेटर पुरविण्याचे आदेश जिल्हा शल्यचिकित्सकांनी दिले आहेत. वास्तविक पुरवठाधारकांनी मॉडेल क्रमांक बदलून पुरवठा केला आहे.

कंत्राटदाराकडून सांगितली ४२हजार किंमत

भोळे यांनी कंत्राटदार प्रभंजन ऑटोला संपर्क करून ऑक्सिजन कॉन्सन्ट्रेटरची किंमत विचारली असता ४२ हजार रुपये सांगितली आहे. मग जिल्हा रुग्णालयाने अधिक दराचे ऑक्सिजन कॉन्सन्ट्रेटर खरेदी कसे केले, असा प्रश्‍न आहे. जे मॉडेल डीई-२ एडब्ल्यू बदलून दुसरे मॉडेल डीई-२ एसडब्ल्यू हे पुरविले आहे. ही मोठी तफावत खरेदीत आहे. या प्रकरणी चौकशी होऊन सत्य बाहेर आणावे, अशी मागणी करण्यात आली आहे. दरम्यान, याबाबत प्रभंजन ऑटोमोबाईलचे संचालक आदित्य जाखेटे यांच्याशी संपर्क साधला असता, ते म्हणाले, की ऑक्सिजन कॉन्सन्ट्रेटरबाबत जिल्हाधिकाऱ्यांना पत्र पाठविले आहे. तुम्ही माझ्या वकिलाशी संपर्क साधा, ते तुम्हाला पत्र देतील.