Leopard Attack: शेळी चराईला गेलेल्या तरुणावर बिबट्याचा हल्ला; आरडाओरड केल्याने बचाव

कुऱ्हा काकोडा (जळगाव) : गावापासून जवळच असलेल्या पिंप्राळा शिवारातील शेतात गेलेल्या एका तरुण शेतकऱ्यावर बिबट्याने हल्ला (Leopard Attack) करून गंभीर जखमी केले. सदर घटना (Jalgaon) शनिवारी (२ डिसेंबर) दुपारी बाराच्या सुमारास घडली. या तरुणाने वेळीच आरडाओरड केल्याने तो थोडक्यात बचावला. (Tajya Batmya)

पिंप्राळा (ता. मुक्ताईनगर) येथील गणेश गणपत झाल्टे (वय ३४) हा तरुण शेतकरी २ डिसेंबरला पिंप्राळा शेतीशिवारात गट क्रमांक १६२ मधील शेतात शेळ्या चराई करण्यासाठी गेला होता. दरम्यान दुपारी बाराच्या सुमारास अचानक बिबट्याने तरुणावर हल्ला केला. हल्ला करताच तरुणाने जीव वाचविण्यासाठी आरडाओरड केली असता बिबट्याने त्याला सोडले. ओरडण्याच्या आवाजाने आजूबाजूस असलेले (Farmer) शेतकरी धावून आले. तोपर्यंत बिबट्या शेताजवळच असलेल्या वनखंड ५७४ मध्ये असलेल्या वन विभागाच्या बंदीत निघून गेला. 

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

शेतकरी जखमी 

जखमी अवस्थेत तरुणाला शेतकऱ्यांनी कुऱ्हा येथील प्राथमिक आरोग्य केंद्रात आणले. घटनेची माहिती मिळताच प्रभारी वनक्षेत्रपाल दत्तात्रय लोंढे यांच्यासह पथकाने घटनास्थळी जाऊन पाहणी केली व जखमीला कुऱ्हा येथे औषधोपचार करून तातडीने मुक्ताईनगर येथील उपजिल्हा रुग्णालयात दाखल नेले. तेथून जळगाव जिल्हा रूग्णालयात नेऊन तेथे उपचार करण्यात आले. यानंतर पुढील उपचार प्राथमिक आरोग्य केंद्रात घेण्यास सांगून डिस्चार्ज दिला. या तरुणावर बिबट्याने उजवा हात आणि खांद्यावर गंभीर दात मारून जखम केली असून, पोटावर पंजाने ओरखडले आहे. दरम्यान, या थरारक हल्ल्यामुळे शेतकरी, शेतमजुरांमध्ये भीतीचे वातावरण निर्माण झाले असून, या बिबट्याचा बंदोबस्त करावा, अशी मागणी होत आहे.