Jamner Accident News : जीप- कंटेनरची समोरासमोर धडक; भीषण अपघातात तीन ठार

जामनेर (जळगाव) : जामनेरपासून जवळच असलेल्या नागदेवता मंदिराजवळ जीप व कंटेनरची (Jalgaon) समोरासमोर धडक झाली. या भीषण अपघातात (Accident) जीपमधील तीन जण ठार झाले. मृत तिघेही संभाजीनगर जिल्ह्यातील गंगापूर येथील असल्याचे समजते. अद्याप मृतांच्या नावांची शहनिशा झाली नसल्याचे पोलिसांनी सांगितले. (Maharashtra News)

जामनेर कडून पहूरकडे भरधाव निघालेल्या कंटेनरने समोरून येत असलेल्या जीपला धडक दिली. या भीषण अपघातात शेख समीर शेख नजीर (वय २०), अल्लाउद्दीन गयासोद्दीन शेख (वय ४०, दोघे रा. बालानगर, ता. पैठण, जि. संभाजीनगर) आणि बोलेरो जीपचा चालक साजन जगन बडोले (वय २५, रा. खंडवा, मध्य प्रदेश) यांचा मृत्यू झाला. तिघेही जामनेर कडून मध्य प्रदेशातील बऱ्हाणपूर- खंडव्याकडे जात होते. या अपघातानंतर कंटेनर चालक फरार झाला आहे.

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

नागरिकांची मदतीसाठी धाव 

अपघात झाल्यानंतर ग्रामस्थांनी तातडीने धाव घेत दोघा मृतांसह गंभीर जखमीला उपजिल्हा रुग्णालयात आणले. अपघाताची माहिती मिळताच रुग्णवाहिका चालक जालम राजपूत, गणेश चौधरी तत्काळ घटनास्थळी दाखल झाले. तर पोलिस उपनिरीक्षक जी. एम. अहिरे हे देखील पथकासह घटनास्थळी पोहोचले. रुग्णवाहिकेसह जालमसिंग राजपूत यांनी ग्रामस्थांच्या मदतीने वाहनातील दोघांचे मृतदेह व गंभीर जखमी असलेल्या एकाला तातडीने उपजिल्हा रुग्णालयात आणले. रुग्णालयात पोहोचेपर्यंत तिसऱ्या व्यक्तीचा मृत्यू झाला होता, असे सांगण्यात आले.