Jamner Accident : कामावरून घरी जाताना मृत्यूने गाठले; दुचाकीसमोर कुत्रा आल्याने झाला अपघात

जळगाव : जळगावहून ड्युटी आटोपल्यानंतर सायंकाळी घरी जाताना दुचाकीसमोर कुत्रा अचानक आडवा आला. यामुळे दुचाकी अनियंत्रित होऊन झालेल्या अपघातात तरुणाचा मृत्यू झाला. सदरची घटना नेरी गावाजवळ घडली. या प्रकरणी पोलिसात अकस्मात मृत्यूची नोंद करण्यात आली आहे.

जामनेर (Jamner) तालुक्यातील पहूर येथील गणेश ज्ञानेश्वर बनकर (वय २७) असे मृत झालेल्या तरुणाचे नाव आहे. पहूर कसबे येथून गणेश हा जळगाव येथे एका गॅस एजन्सीला कामाला आहे. तो रोज दुचाकीने ये- जा करत होता. दरम्यान ३१ जुलैला नेहमीप्रमाणे सकाळी घरून दुचाकीने जळगावला (Jalgaon) कामावर आला होता. दिवसभर काम केल्यानंतर संध्याकाळच्या सुमारास कामावरून घरी परत जात असताना त्याच्या दुचाकींचा अपघात झाला. 

सायंकाळी सात वाजेच्या सुमारास महामार्गावर नेरी येथे जामनेर फाट्याजवळ पोहचला असताना दुचाकीच्या समोर अचानक कुत्रा आडवा आला. यामुळे दुचाकीला (Accident News) अपघात झाला. यात गणेशच्या डोक्याला गंभीर दुखापत झाली होती. त्याला लागलीच जळगाव येथे रुग्णालयात उपचारासाठी दाखल करण्यात आले होते. मात्र उपचार सुरू असताना त्याचा मृत्यू झाला. गणेशचा मृत्यू झाल्याचे समजताच कुटुंबीयांनी एकच आक्रोश केला.