Chopda Accident : अनियंत्रित बसने दुचाकीसह पायी चालणाऱ्यांना उडविले; दोघांचा मृत्यू, दोन गंभीर जखमी

चोपडा (जळगाव) : राज्य परिवहन महामंडळाची प्रवासी घेऊन मार्गस्थ झाली असताना चालकाचे बसवरील नियंत्रण सुटले. यात रस्त्यावरून जाणाऱ्यांना धडक देत बस पुढे जाऊन थांबली. यात एका दुचाकीस्वाराचा आणि पायी जाणाऱ्या तरुणाचा जागीच मृत्यू झाल्याची घटना चोपडा शहरातील स्वस्तिक टॉकीज रोडवर घडली. तसेच या अपघातात दुचाकीस्वाराची पत्नी व अन्य एकजण जखमी झाले आहेत. 

जळगावच्या चोपडा शहरातील बारा मोहल्ला भागाजवळ २० मे रोजी दुपारी लासूर- चोपडा हि बस येत चोपडा बसस्थानकाकडे येत होती. बारा मोहल्ला परिसरात असलेल्या मशिदीजवळील उतारावर बस चालक दीपक पाटील यांचा बसवरील ताबा सुटला आणि भरधाव बसने दुचाकीला जबर धडक दिली. धडक इतकी भयानक होती, की दुचाकीवरील दोघेजण दूरवर फेकले गेले. यात दुचाकीस्वार रवींद्र भिवसन बहारे (वय ३५) बसच्या चाकाखाली येऊन जागीच ठार झाले. तर मृताची पत्नी गंभीर जखमी आहे. 

पायी चालणाऱ्या तरुणाचाही मृत्यू 

तसेच अपघातात रस्त्याने पायी चालणारा तरुण रईसखाँ रशीदखाँ पठाण (वय २९, रा. बारगनअली, चोपडा) याचा देखील बसच्या धडकेत मृत्यू झाला. तर सोबत असलेला त्याचा मित्र किरकोळ जखमी झाला आहे. हा अपघात इतका भयंकर होता, की अपघात स्थळापासून बस चालकाने पुढच्या चाकाखाली अडकलेली दुचाकी अर्धा किलोमीटर त्रिवेणी चौकापर्यंत ओढत आणली. घटनेनंतर नागरिकांची गर्दी झाली होती. 

चालक पोलिसात झाला जमा 

अपघाताची माहिती मिळताच शहर पोलिस घटनास्थळी दाखल झाले. तर अपघातातील जखमींना रुग्णालयात उपचारासाठी दाखल करण्यात आले आहे. दोघी मृताच्या नातेवाइकांनी रुग्णालयात गर्दी केली होती. दरम्यान, बस चालक स्वतः पोलिस स्टेशनमध्ये जाऊन जमा झाला आहे. याबाबत चोपडा शहर पोलिस ठाण्यात चालक दीपक पाटील याच्याविरोधात गुन्हा दाखल करण्यात आला आहे.