Amalner News : कंत्राट मिळवून देण्याच्या नावाने तरुणाची फसवणूक; साडेअकरा लाख घेत देण्यास नकार

अमळनेर (जळगाव) : ऑप्टिकल फायबर टाकण्याच्या कामाचा कंत्राट मिळवून देण्याचे सांगत जामनेरच्या एका तरुणाची साडेअकरा लाखांत फसवणूक करण्यात आल्याचा प्रकार समोर आला आहे. दरम्यान पैशांची मागणी केल्यानंतर सदर तरुणास धमकी देण्यात आली होती. या प्रकरणी पोलिसात गुन्हा दाखल करण्यात आला आहे. 

अमळनेरच्या (Amalner News) विजय धनराज पाटील या तरुणाची फसवणूक झाली आहे. अमळनेरमध्ये व्यंकटेश इंटरप्रायझेस नावाची फर्म असून १५ ऑगस्ट २०२० ला सायंकाळी पाच वाजता त्यांच्या ओळखीचे जामनेर येथील राहुल दत्तात्रय चव्हाण, सागर दत्तात्रय चव्हाण या दोघांनी विजयच्या घरी आले. त्यांनी विजयला ऑप्टिकल फायबर कंत्राट देतो, असे सांगून १५ लाख रुपयांची मागणी केली. त्यानुसार विजय याने टप्प्याटप्याने ११ लाख ५० हजार रुपये दिले. 

पैशांची मागणी केल्याने जीवे मारण्याची धमकी 

मात्र राहुल आणि सागर या दोघांनी ऑप्टिकल फायबर केबलचा ठेका दिला नाही. यामुळे विजयने पैशाची मागणी केली असता (Fraud) दोघांनी तगादा लावू नको; अन्यथा तुला संपवून टाकू, अशी धमकी दिली. अमळनेर पोलिस ठाण्यात दोघांविरुद्ध फसवणुकीचा गुन्हा दाखल करण्यात आला असून, तपास पोलिस निरीक्षक विकास देवरे करीत आहेत.