Jalgaon Accident : घरापासून काही अंतरावर गेले अन् काळाचा घाला; अपघातात पत्नीचा मृत्यू, पती गंभीर जखमी

जळगाव : नवीन घराचे बांधकाम सुरु असल्याने त्या भागात पहाटेच नळाला पाणी येणार होते. यामुळे पाणी भरण्यासाठी पती- पत्नी औद्योगिक वसाहत मधील घरापासून दुचाकीने मार्गस्थ झाले. परंतु घरापासून काही अंतरावर पोहचताच दाम्पत्याच्या दुचाकीला वाहनाने जोरदार धडक दिली. या अपघातात पत्नीचा जागीच मृत्यू झाला तर पती गंभीर जखमी आहे. 

अनिता सुनील राणे असे अपघातात मृत झालेल्या महिलेचे नाव आहे. (Jalgaon) जुन्या औद्योगिक वसाहत परिसरातील सदगुरु नगरात राहणारे अनिता व पती सुनील राणे यांचे रिंगरोड येथे घराचे बांधकाम सुरू आहे. दरम्यान बुधवारी पहाटे तीनच्या सुमारास बांधकामावर पाणी भरण्यासाठी सुनील राणे हे पत्नी अनिता यांना दुचाकीने घेऊन घरून निघाले होते. अजिंठा चौकातून दुचाकीने जात असताना समोरून आलेल्या एका अज्ञात वाहनाने राणे दाम्पत्याच्या दुचाकीला जोरदार (Accident) धडक दिली. या धडकेत अनिता राणे यांचे डोके थेट धडापासून वेगळे झाले. त्यामुळे त्यांचा जागेवरच मृत्यू झाला तर पती सुनील राणे यांनाही मार लागला.

वर्दळ नसल्याने मदतीला कोणीच नाही 
पहाटेची वेळ असल्याने महामार्गावर फारशी वर्दळ नव्हती. यामुळे अपघात झाल्यानंतर बराच वेळ मदत मिळू शकली नाही. मात्र अजिठा चौकातील रिक्षास्टॉपवर एका रिक्षा चालकाला अपघात झाल्याचे दिसल्याने त्याने तत्काळ एमआयडीसी पोलिसांना फोन करून घटना कळविली. ड्यूटीवरील पोलिसांनी घटनास्थळी धाव घेत जखमीसह मृत महिलेला उचलून जिल्‍हा रुग्णालयात हलविले. या प्रकरणी एमआयडीसी पोलिसांत अकस्माक मृत्यूची नोंद करण्यात आली आहे.