Jalgaon Accident : दुचाकींची समोरासमोर धडक; पत्नीचा मृत्यू, पतीसह मुलगी जखमी

जळगाव : एरंडोल रस्त्यावर दोन दुचाकींची समोरासमोर धडक होऊन अपघात झाला. यात पती- पत्नी मुलीसह जात होते. यात अपघातात एका महिलेचा मृत्यू झाला आहे. तर पतीसह लहान मुलगी आणि दुसऱ्या दुचाकीवरील आणखी एक व्यक्ती गंभीर जखमी झाले आहेत. यातील जखमींची प्रकृती गंभीर असल्याने त्यांना जळगाव येथील शासकीय वैद्यकीय महाविद्यालयात हलविण्यात आले आहे.

जळगाव- एरंडोल मार्गावर सदरचा अपघात २२ फेब्रुवारीला सायंकाळी पाचच्या सुमारास घडली. धरणगाव पोलिसांनी घटनास्थळी धाव घेऊन घटनेची माहिती जाणून घेतली. या भीषण अपघातात एका दुचाकीवरील बोरखेडा येथील किरण पुंडलिक मराठे (वय ३५) हे जात होते. तर दुसऱ्या दुचाकीवरील राकेश दुपसिंग बारेला (वय ४५), शानूबाई राकेश बारेला (वय ३५) आणि त्यांची मुलगी कान्हाबाई राकेश बारेला (वय ५, रा.चाचपणी, दुधखेडा बलवाडी, मध्य प्रदेश) हे होते. या दोन्ही दुचाकींचा समोरासमोर धडक झाली. 

महिलेचा उपचारादरम्यान मृत्यू 

या अपघातात शानूबाई बारेला हि गंभीर जखमी झाली असता धरणगाव ग्रामीण रुग्णालयात उपचारासाठी दाखल करण्यात आले होते. मात्र उपचारादरम्यान महिलेचा मृत्यू झाला. तर राकेश व त्याची मुलगी कान्हाबाई बारेला व किरण मराठे हे जखमी असून त्यांना  उपचारासाठी जळगाव शासकीय वैद्यकीय महाविद्यालयात रवाना केले. घटनेबाबत पोलिसांकडून तपस सुरु आहे. 

दुचाकी धडकेत कर्मचारी जखमी 

जळगाव शहरातील शिवाजीनगर रेल्वे उड्डाणपुलावर दोन दुचाकींच्या धडकेत महावितरणचा कर्मचारी गंभीर जखमी झाला आहे. कांचन नगरातील रहिवासी समाधान विजय कोळी (वय २३) महावितरण कंपनीत वायरमन म्हणून नोकरीला आहेत. ते १९ फेब्रुवारीला रात्री दहाला दुचाकीने शिवाजीनगर उड्डाणपुलावरून जात होते. यावेळी समोरून येणाऱ्या दुचाकीने जोरदार धडक दिली. यात समाधान कोळी गंभीर जखमी झाले. त्यांना तातडीने शासकीय वैद्यकीय महाविद्यालयात उपचारार्थ दाखल करण्यात आले.