Vande Bharat Sleeper Train : आणखी एक वंदे भारत स्लीपर धावणार, कोणता असेल मार्ग, वाचा सविस्तर

काही महिन्यांपूर्वी वंदे भारत स्लीपर एक्सप्रेसचे नवीन रूप आपल्याला पाहायला मिळाले. या ट्रेनच्या यशस्वी प्रयोगानंतर आणखी एक वंदे भारत स्लीपर ट्रेन धावणार असल्याचे म्हटले जात आहे. ही दुसरी वंदे भारत स्लीपर ट्रेन मार्च महिन्यात धावणार आहे. या ट्रेनमुळे नागरिकांचा प्रवास सुखरूप होणार असून २०२६ पर्यंत एकूण १२ वंदे भारत स्लीपर ट्रेन चालवण्याचे लक्ष्य असल्याचे रेल्वे अधिकाऱ्यांनी म्हटले.

रेल्वे बोर्डाच्या एका वरिष्ठ अधिकाऱ्याने सांगितले की, देशातील दुसरी वंदे भारत स्लीपर मार्चमध्ये रुळावर येईल. तिचा मार्ग अद्याप निश्चित झालेला नाही, परंतु हिंदुस्थानच्या रिपोर्टनुसार दिल्ली-हावडा, दिल्ली-मुंबई किंवा चेन्नई-बेंगळुरू-मुंबई दरम्यान ही ट्रेन चालवली जाईल.

तसेच २०२६ पर्यंत एकूण १२ वंदे भारत स्लीपर ट्रेन चालवण्याचे लक्ष्य आहे. प्रत्येक ट्रेन तांत्रिकदृष्ट्या आणि सोयीस्करपणे आधीच्या ट्रेनपेक्षा अपग्रेड केली जाईल. प्रवाशांना विमान किंवा फाईव्ह स्टार हॉटेलसारखा अनुभव देण्यासाठी भारत अर्थ मूव्हर्स लिमिटेड (BEML) ने वंदे भारत स्लीपरची रचना केली आहे.

या स्लीपर ट्रेनमध्ये पहिल्यांदाच बोल्स्टरलेस कोच वापरण्यात आले आहेत. यामुळे ट्रेन कितीही वेगात असली तरी टेबलावरून चहाचा कप देखील पडू शकत नाही. तसेच विमानात ज्याप्रमाणे बायो-व्हॅक्यूम टॉयलेट आणि टच-फ्री नळ बसवण्यात आले आहेत, त्याचप्रकारे नवीन डिझाइन केलेल्या, वंदे भारत स्लीपर ट्रेनमध्ये स्मार्ट सेन्सर लाईट्स, व्हॅक्यूम टॉयलेट, बोल्स्टरलेस कोच आणि ब्रँडेड केटरिंग असणार आहे.