Hingoli News : अंगदुखीवर आयुर्वेदिक उपचार घेतले अन् घडला भलताच प्रकार; उपचारासाठी जिल्हा रुग्णालयात दाखल

हिंगोली : अंगदुखीचा त्रास जाणवत असल्याने त्यावर आयुर्वेदिक उपचार घेण्यासाठी एका आयुर्वेदिक डॉक्टराकडे काहीजण गेले. या डॉक्टराने दिलेल्या गोळ्या घेतल्यानंतर नागरिकांना वेगळाच त्रास जाणवू लागला होता. गोळ्या सेवन केल्याने शरीरावर जखमा झाल्याचा प्रकार हिंगोलीच्या वसमत तालुक्यातील हयात नगर भागात घडला आहे. या नागरिकांवर सध्या जिल्हा रुग्णालयात उपचार सुरु आहेत. 

हिंगोली जिल्ह्यातील वसमत तालुक्यात आर्वी निकम हा आयुवेदिक उपचार करणारा वैद्य आला होता. निकम हा पुणे जिल्ह्यातील इंदापूर येथील रहिवासी आहे. अंगदुखीवर गोळ्या देत पाच तासात अंगदुखीचा त्रास थांबेल असे आश्वासन आर्वी निकम यांच्याकडून रुग्णांना देण्यात येत होते. यामुळे अंगदुखीचा त्रास होत असलेले गावातील काहीजण निकम यांच्याकडे गेले होते. यावेळी त्याने काही औषधी रुग्णांना दिली. 

शरीरावर झाल्या जखमा 

अंगदुखीसाठी आयुर्वेदिक गोळ्या असल्याने यावर नागरिकांनी विश्वास ठेवला. पाच तासात अंगदुखी थांबेल असे सांगण्यात आल्याने नागरिकांनी गोळ्या घेतल्या. मात्र या गोळ्या घेणे रुग्णांच्या चांगलेच अंगलट आले आहे. कारण गोळ्या सेवन केल्यानंतर काही तासांनी या नागरिकांना अचानक शरीरावर जखमा व्हायला सुरुवात झाली आहे. दरम्यान या धक्कादायक प्रकारानंतर अनेक नागरिक शासकीय रुग्णालयात दाखल झाले असून तिथे त्यांच्यावर उपचार सुरू आहेत. 

बोगस डॉक्टरांवर होणार कारवाई 

आयुर्वेदिक गोळ्या घेतल्याने अंगावर जखमा झाल्याची माहिती मिळाली. जडीबुटी देणारा डॉक्टर उपचार करत असल्याची माहिती मिळाली आहे. त्यानुसार जिल्ह्यात जे कोणी बोगस डॉक्टर तसेच अवैध वैद्यकीय व्यवसाय करणाऱ्या डॉक्टरांवर कारवाई करण्यात येणार आहे. तालुकास्तरीय समितीमार्फत हि कारवाई करण्यात येणार असल्याचे हिंगोलीचे जिल्हा आरोग्य अधिकारी कैलाश शेळके यांनी सांगितले.