Hingoli Water Shortage : पुराचा फटका; हिंगोलीत सात दिवसांपासून पाणीपुरवठा बंद, पुरात वाहून गेली मुख्य जलवाहिनी

हिंगोली : हिंगोलीत आलेल्या महापुरामुळे हिंगोली शहराला पाणी पुरवठा करणारी मुख्य जलवाहिनी पुराच्या पाण्यात वाहून गेली आहे. यामुळे मागील सात दिवसांपासून शहरातील नागरिकांच्या पिण्याच्या पाण्याचा प्रश्न निर्माण झाला आहे. अर्थात भर पावसाळ्यात हिंगोली शहरातील नागरिकांवर पाण्यासाठी भटकंती करण्याची वेळ आली आहे. 

मागील आठवड्यात हिंगोली (Hingoli) शहरासह परिसरात मुसळधार पाऊस झाला होता. या पावसामुळे पूरजन्य परिस्थिती निर्माण झाली होती. यात अनेकांच्या घरात, दुकानात पाणी शिरल्याने मोठे नुकसान झाले होते. दरम्यान याच पुरात हिंगोली शहराला पाणी पुरवठा करणारी मुख्य पाईप लाईनच वाहून गेली आहे. यामुळे शहरातील नागरिकांसमोर पिण्याच्या पाण्याचा गंभीर प्रश्न उद्भवला आहे. हिंगोली पालिकेच्या पाणीपुरवठा (Water Supply) विभागाकडून या पाईप लाईनच्या दुरुस्तीचे युद्धपातळीवर काम सुरू आहे. 

मागील सात दिवसांपासून पिण्याच्या पाण्याची समस्या निर्माण झाली आहे. पाईप लाईन दुरुस्तीचे काम अजून पुढील काही दिवस सुरू राहणार असल्याने पाणी पुरवठा होणे अशक्य आहे. परिणामी हिंगोली शहरातील एक लाखांपेक्षा अधिक नागरिकांना शुद्ध पाणी पैसे देऊन खरेदी करावे लागत आहे. दरम्यान शहरातील नागरिकांनी विहिरी व बोरवेलचे पाणी उकळून प्यावे; असे आवाहन हिंगोली पालिकेसह आरोग्य विभागाच्या वतीने करण्यात आले आहे.