Hingoli News: वय उलटूनही लग्न जमेना, नैराश्यातून तरुणाने संपवलं जीवन; हिंगोलीतील धक्कादायक घटना

संदीप नागरे, साम टीव्ही हिंगोली

चांगलं शिक्षण होऊनही हाताला काम मिळालं नाही. त्यातच शेतीत कमी असल्याने कुणी मुलगी द्यायला तयार झालं नाही. यामुळे ३१ वर्षीय तरुणाला नैराश्य आलं. याच नैराश्यातून त्याने आपली जीवनयात्रा संपवली. काळीज पिळवटून टाकणारी ही घटना हिंगोलीतील जामठी खुर्द गावात शुक्रवारी (ता. १७) दुपारच्या सुमारास घडली.

नामदेव त्रिंबक जाधव (वय ३१) असं आत्महत्या केलेल्या तरुणाचं नाव आहे. नामदेवने शेतशिवारात असलेल्या झाडाला गळफास घेऊन आपलं जीवन संपवलं आहे. या घटनेनं परिसरातून हळहळ व्यक्त होत आहे. सध्या ग्रामीण भागातील तरुणांच्या लग्नाचा प्रश्न गंभीर बनत चालला आहे.

प्रत्येक गावात सरासरी २० ते २५ तरुण लग्नासाठी आहे. मात्र, पुरेसं शिक्षण होऊनही नोकरी मिळत नसल्याने तसेच घरी कमी शेती असल्याने या तरुणांना लग्नासाठी मुलगी मिळणं कठीण झालंय. त्यामुळे अनेक तरुण नैराश्यात गेले आहेत.

हिंगोलीच्या जामठी गावातील नामदेव हा देखील लग्नासाठी मुलगी शोधत होता. मात्र, त्यालाही कुणी लग्नासाठी मुलगी दिली नाही. यामुळे नामदेव हा नैराश्यात गेला होता. आपलं लग्न होणार की नाही याची चिंता त्याला लागली होती. अखेर नामदेवने आपली जीवनयात्रा संपवण्याचा निर्णय घेतला.

शुक्रवारी दुपारच्या सुमारास नामदेव हा शेतशिवारात गेला. तिथे त्याने एका झाडाला गळफास घेऊन आपली जीवनयात्रा संपवली. नामदेव यांच्या मृत्यूची बातमी गावात वाऱ्यासारखी पसरली. या घटनेनं नामदेवच्या कुटुंबियांनाही मोठा धक्का बसला आहे. याप्रकरणी गोरेगाव पोलीस ठाण्यात आकस्मिक मृत्यूची नोंद करण्यात आली आहे.