Shinde vs Thackeray : हातकणंगलेत हायव्होल्टेज राडा! शिंदे-ठाकरे गटाच्या कार्यकर्त्यांमध्ये धक्काबुकी

सांगली : राज्यातील ११ लोकसभा मतदारसंघात मतदान सुरु आहे. या पार्श्वभूमीवर विविध मतदारसंघातील विविध मतदान केंद्रावर मोठ्या प्रमाणात राजकीय कार्यकर्त्यांची मोठी गर्दी पाहायला मिळत आहे. अशीच परिस्थिती हातकणंगले लोकसभा मतदारसंघात पहायला मिळत आहे. याचदरम्यान हातकणंगलेतील एका मतदान केंद्रावर ठाकरे आणि शिंदे गटाच्या कार्यकर्त्यांमध्ये जोरदार राडा झाल्याची घटना घडली.

हातकणंगले लोकसभा मतदारसंघातील वाळवा तालुक्यालील साखराळे गावातील मतदान केंद्रावर सकाळापासून मतदान हजेरी लावत आहेत. या मतदान केंद्रावर महायुतीचे उमेदवार धैर्यशील माने यांचे कार्यकर्ते आणि महाविकास आघाडीचे उमेदवार सत्यजित पाटील सरुडकर यांचे कार्यकर्ते मतदान केंद्रावर आले होते. हे सर्व कार्यकर्ते बूथ क्रमांक 62,63 वर जमले होते. त्याचवेळी या दोन्ही गटाच्या कार्यकर्त्यांमध्ये बाचाबाची झाली. त्यानंतर दोन्ही गटाच्या कार्यकर्त्यांमध्ये धक्काबुकी झाली.

नेमकं काय घडलं?

यावेळी मतदान केंद्र क्रमांक 62 आणि 63 वर सत्यजित पाटील सरूडकर यांचे बोगस प्रतिनिधी यांच्यावर कारवाई करावी, मागणी करत धैर्यशील माने यांच्या गटाच्या कार्यकर्त्यांनी मतदान केंद्र काही काळ बंद ठेवलं होतं. त्यामुळे सत्यजीत पाटील सरुडकर यांचे कार्यकर्त्यांनी आक्रमक भूमिका घेत दोन्ही गटात शाब्दिक वादावादी होऊन राडा झाला.

पोलिसांनी वेळेत हस्तक्षेप केला, त्यामुळे पुढील मोठा अनर्थ टळला. सध्या या ठिकाणी पोलीस बंदोबस्त वाढविण्यात आला आहे. पोलिसांचा हस्तक्षेप झाल्यानंतर आता सध्या मतदान सुरळीत सुरू असल्याची माहिती मिळकत आहे. या घटनेनंतर धैर्यशील माने गटाचे दत्तात्रेय पाटील यांनी सत्यजित पाटील सरूडकर यांच्या बोगस प्रतिनिधींवर कारवाई करण्याची मागणी केली आहे.