हरिश्चंद्रगडावर भीषण दुर्घटना! दरड कोसळली, मुंबईचे २ ट्रेकर्स मातीखाली गाडले गेले

पावसाळ्यात अनेक पर्यटक पावसाळी सहलीला जात असतात. गड किल्ले आणि धबधबे हे मुख्य आकर्षण असतात. पर्यटकांचं असेच एक आवडतं ठिकण म्हणजे भंडारदरा परिसरातील ऐतिहासिक हरिश्चंद्रगड. रविवारच्या सुट्टीमुळे या परिसरात पर्यटकांची मोठी गर्दी झाली असताना ही दुर्घटना घडली. येथे पर्यटकांची मोठी गर्दी होत असते. परंतु या ठिकाणी एक दुर्घटना घडलीय. ट्रेकर्स गडावरून खाली उतरत असताना अचानक दरड कोसळल्याने मुंबईतील मालाड येथील चार पर्यटक गंभीर जखमी झालेत.

हाती आलेल्या माहितीनुसार, मुंबईतील मालाडमधील १० पर्यटकांचा एक ग्रुप हरिश्चंद्रगडावर ट्रेकिंगसाठी गेला होता. रविवारी दिवसभर पाऊस सुरू होता. त्यावेळी हा ग्रुप गडावरून खाली उतरत होता. गडावरील आडव्या कठड्याच्या मागील बाजूला पोहोचले असताना दरड कोसळली. माती आणि दगडांचा ढिगारा अंगावर आल्याने दोन पर्यटक थेट मातीखाली गाडले गेले. तर इतर दोन जणांना दगडांचा मार लागल्याने ते गंभीर जखमी झाले.

दरड कोसळली तेव्हा सुदैवाने तेथे पर्यटकांच्या सुरक्षेसाठी बांधलेले लोखंडी रेलिंग होते. या रेलिंगमुळे पर्यटकांना आधार मिळाला. त्यामुळे ते खोल दरीत कोसळण्यापासून वाचले. अपघात घडताच सोबतच्या इतर पर्यटकांनी एका स्थानिक ग्रामस्थांना माहिती देत पायथ्याखालील गावाला आणि वन्यजीव विभागाला घटनेची माहिती दिली.

रुग्णालयात उपचार सुरू

माहिती मिळताच गावकऱ्यांनी तातडीने गडावर धाव घेतली. गावकऱ्यांनी युद्धपातळीवर प्रयत्न करून मातीच्या ढिगाऱ्याखाली गाडल्या गेलेल्या पर्यटकांना सुरक्षित बाहेर काढले. त्यांना उचलून गडाच्या पायथ्याशी आणले. जखमी पर्यटकांना तातडीने राजूर येथील रुग्णालयात प्राथमिक उपचारासाठी दाखल करण्यात आले. मात्र, त्यांची प्रकृती गंभीर असल्याने प्राथमिक उपचारानंतर पुढील उपचारासाठी त्यांना तत्काळ नाशिक येथील रुग्णालयात हलवण्यात आले.