Manmad Vande Bharat : मनमाडकरांसाठी खुशखबर! आणखी एक वंदे भारत थांबणार, तिकिट किती?

मनमाडकरांसाठी आनंदाची बातमी आहे. आता मुंबई छत्रपती शिवाजी महाराज टर्मिनस (CSMT) ते साईनगर शिर्डी या मार्गावर धावणाऱ्या वंदे भारत एक्स्प्रेसला मनमाड जंक्शन येथे थांबा मंजूर करण्यात आल्याची माहिती समोर आली आहे. या निर्णयामुळे मनमाडसह परिसरातल्या प्रवाशांना आधुनिक आणि वेगवान रेल्वे प्रवासाची सुविधा मिळायला मदत होणार आहे.

आता या निर्णयाबद्दल पंतप्रधान नरेंद्र मोदी आणि केंद्रीय रेल्वेमंत्री अश्विनी वैष्णव यांचे आभार व्यक्त करण्यात आले आहेत. मनमाड हे उत्तर महाराष्ट्रातील महत्त्वाचे रेल्वे जंक्शन असून, येथून मुंबई, नाशिक, शिर्डी आणि इतर प्रमुख शहरांकडे प्रवास करणाऱ्या प्रवाशांची मोठी वर्दळ असते.

मुंबई–शिर्डी वंदे भारत एक्स्प्रेसचा मार्ग कोणता?

मुंबई छत्रपती शिवाजी महाराज टर्मिनस (CSMT) ते साईनगर शिर्डी हा या वंदे भारत एक्स्प्रेसचा प्रमुख मार्ग आहे. त्यामुळे मुंबई आणि शिर्डी दरम्यान प्रवास करणाऱ्या भाविकांना आणि इतर प्रवाशांचा प्रवास हा धावपळीत न जाता आरामदायी होईल. मनमाड जंक्शनला थांबा मिळाल्यामुळे या परिसरातल्या प्रवाशांनाही या सेवेचा लाभ घेता येणार आहे.

वंदे भारतचे तिकीट किती? मनमाडहून संभाव्य भाडे किती असू शकते?

मनमाडकरांसाठी वंदे भारत एक्स्प्रेसच्या थांब्याची बातमी आनंदाची असली, तरी या गाडीने प्रवास करण्यासाठी नेमके किती पैसे मोजावे लागतील, असा प्रश्न प्रवाशांना पडला आहे. मुंबई CSMT ते साईनगर शिर्डी या मार्गावरील वंदे भारत एक्स्प्रेसचे सुरुवातीचे जाहीर भाडे खानपानासह चेअर कारसाठी ९७५ आणि एक्झिक्युटिव्ह चेअर कारसाठी १८४० होते.

खाण्यापिण्याच्या खर्चाशिवाय हे दर अनुक्रमे ८४० आणि १६७० होते. वंदे भारत एक्स्प्रेसचे तिकीट प्रवासाचे अंतर, चेअर कार (CC) किंवा एक्झिक्युटिव्ह चेअर कार (EC) या आसनप्रकारानुसार बदलते.