Gondia News : सागवान लाकडाची तस्करी करणारे वन विभागाच्या ताब्यात; सागवान चिरान केले जप्त

शुभम देशमुख 

गोंदिया : सागवान झाडाची तोड करून त्याची तस्करी करण्यास बंदी आहे. मात्र या लाकडाची चोरून तस्करी केली जात आहे. अशाच प्रकारे गोंदिया जिल्ह्याच्या सडक वनपरिक्षेत्र कार्यालयाअंतर्गत येणाऱ्या क्षेत्र सहायक कार्यालय शेंडा कोयलारी येथे वन विभागाच्या कर्मचाऱ्यांनी धाड टाकून सागवानाची तस्करी करणाऱ्या तीन आरोपीना ताब्यात घेतले आहे.

गोंदिया (Gondia) जिल्ह्यातील सडक वनपरिक्षेत्रातंर्गत शेंडा सहवन क्षेत्रात गेल्या अनेक दिवसांपासून अवैध सागवान तस्करी सुरू असल्याची चर्चा होती. याबाबत वन विभागाला देखील माहिती मिळाली होती. या माहितीवरून वन विभागाच्या (Forest Department) अधिकारी व कर्मचाऱ्यांनी यावर बारीक लक्ष ठेवले असता काही लाकूड तस्कर आपल्या घरी सागवान चिरान करीत असल्याची माहिती वन विभागाच्या कर्मचाऱ्यांना मिळाली. यानंतर त्यांनी कोयलारी गावातील संशयित निलेश मेश्राम, राधेश्याम नेवारे, बाबुदास नेवारे यांना जंगलातून सागवान तोडून त्याचे चिरान करताना त्यांच्या घरी पकडले. 

वन विभागाकडून गुन्हा दाखल 

वन विभागाच्यावतीने टाकण्यात आलेल्या धाडीत सागवान लाकूड आढळून आले आहेत. या कारवाईत त्यांच्या कडून साधारण ५२ नग ०.५२५ घनमीटर असे सागवान चिरान जप्त करण्यात आली आहे. या प्रकरणी वन विभागाने ताब्यात घेतलेल्या संशयितांच्या विरुद्ध वन कायद्यानुसार गुन्हा दाखल करण्यात आला आहे. ही कारवाई वनपरिक्षेत्र अधिकारी मिथुन तरोणे यांच्या मार्गदर्शनात करण्यात आली आहे.