जळगावच्या सुवर्णनगरीत सोन्याने पुन्हा भाव खाल्ला
२४ कॅरेट सोनं १.३२ लाखांवर पोहोचलं
चांदीचे दर १.७४ लाख रुपये प्रति किलो झाले
सोनं-चांदीचे दर वाढल्याने ग्राहकांच्या खिशाला कात्री
सोनं खरेदी करणाऱ्यांसाठी महत्वाची बातमी आहे. सोन्याच्या दरात पुन्हा मोठी वाढ झाली आहे. सोन्याचे दर कमी होण्याची सर्वजण वाट पाहत होते. पण हे दर कमी होण्याऐवजी वाढतच चालले आहे. त्यामुळे ग्राहकांमध्ये नाराजी पाहायला मिळत आहे. दिवाळीमध्ये सोनं खरेदी करण्याकडे ग्राहकांचा जास्त कल असतो. पण ऐन दिवाळीत सोन्याने नवा उच्चांक गाठला आहे. जळगावच्या सुवर्णनगरीमध्ये सोनं-चांदीच्या दरात आतापर्यंतची सर्वात मोठी वाढ झाली आहे. २४ कॅरेट सोनं १ लाख ३२ हजारांवर पोहचले आहे. त्यामुळे यंदा दिवाळीत सोनं खरेदी करताना ग्राहकांच्या खिशाला कात्री लागणार हे नक्की.
जळगावच्या सुवर्णनगरीत सोन्या-चांदीच्या बाजारात चांगलीच लगबग पाहायला मिळत आहे. सुवर्णनगरीमध्ये सोनं-चांदीच्या दरात आज मोठी वाढ झाली आहे. २४ कॅरेटचे १ तोळा सोन्याचे दर १,२८,००० रुपये इतके झाले आहे. हे सोनं जीएसटीसह १,३२,८४० रुपयांना खरेदी करावे लागणार आहे. तर आज २२ करेटचे १ तोळा सोनं खरेदी करण्यासाठी १,१७,२५० रुपये खर्च करावे लागणार आहेत. चांदीच्या दरात देखील चांगलीच वाढ झाली आहे. १ किलो चांदींचे दर १,६९,००० रुपयांवर गेले आहेत. ही चांदी खरेदीसाठी जीएसटीसह १,७४,०७० रुपये खर्च करावे लागतील.
साडेतीन मुहूर्तापैकी एक मानल्या जाणाऱ्या लक्ष्मीपूजनाच्या मुहूर्तानिमित्त सोने-चांदी खरेदीसाठी नागरिकांची पसंती दिसून येते आहे. महालक्ष्मीच्या सोन्या-चांदीच्या आकर्षक मूर्तींसह कॉईन आणि दागिन्यांची खरेदी करण्यासाठी सुवर्ण दुकाने आणि प्रतिष्ठानांमध्ये ग्राहकांचा ओघ अखंड सुरू आहे. मात्र, मागील वर्षाच्या तुलनेत यंदा सोन्या-चांदीच्या दरात तब्बल विक्रमी वाढ झाली आहे. मागील वर्षी सोन्याचा दर ८० हजार रुपयांच्या घरात होते. तर यंदा ते १,३२,८४० इतके झाले आहे. तब्बल यामध्ये ५० हजार रुपयांपेक्षा जास्त वाढ झाली आहे. तर चांदीचा दर मागच्या वर्षी ९६ हजार रुपये इतका होता. सध्या तो दर ७८ हजारांनी वाढून तब्बल १,७४,००० रुपये प्रति किलो इतका झाला आहे.
या भाववाढीच्या पार्श्वभूमीवर गुंतवणूकदार वर्गाने मात्र सोन्या-चांदीतील गुंतवणूक वाढविली आहे. अनेक ग्राहक सणासुदीच्या शुभमुहूर्ताचा फायदा घेत लहान प्रमाणात गुंतवणूक करण्यावर भर देत आहेत. लक्ष्मीपूजनासाठी महालक्ष्मीच्या चांदीच्या मूर्ती, सोने-चांदीचे नाणे, तसेच शुभचिन्हांच्या वस्तू खरेदीला विशेष मागणी आहे. शहरात सणाचा उत्साह चांगलाच ओसंडून वाहत असून सोन्याच्या दरातील वाढ असूनही जळगावची सुवर्णनगरी पुन्हा एकदा चमकू लागली आहे.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.