Nilesh Ghaywal : गुंड निलेश घायवळने लंडनला जाण्यासाठी पासपोर्ट कसं मिळवलं? पोलिस यंत्रणेलाही पत्ता लागेना

पुण्यातील कोथरूड गोळीबार प्रकरणी घायवळ टोळीचा प्रमुख निलेश घायवळने पासपोर्ट काढण्यासाठी चुकीचा पत्ता दिल्याचे तपासातून समोर आलं आहे. शासनाच्या अनेक यंत्रणांची फसवणूक करून निलेश घायवळने पासपोर्ट मिळवला असल्याची माहिती पोलिसांनी दिली आहे. पुण्यात अनेक गुन्हे असल्यामुळे पासपोर्ट मिळाला नसता त्यामुळे थेट अहिल्यानगरमधील एका चुकीचा पत्ता दाखवत कागदपत्र देत पासपोर्ट मिळवला.

अहिल्यानगर पोलिसांनी त्याचा येथील पत्त्यावर घायवळ 'Not Available' असा शेरा दिल्यावर सुद्धा त्याला पासपोर्ट मिळालाच कसा असा प्रश्न आता निर्माण झालाय. पुणे पोलिसांनी घायवळ विरोधात लुक आऊट नोटीस जारी केला आहे. या प्रकरणाचा पोलिसांकडून पुढील तपास सुरू आहे. पुण्यातील कोथरूड गोळीबार प्रकरणी घायवळ विरोधात मोक्का अंतर्गत कारवाई करण्यात आली आहे.

पोलीस उपायुक्त संभाजी कदम यांनी सांगितलं की, 'निलेश घायवळने २०१९ साली पासपोर्ट मिळवला. त्यावेळी दिलेला पत्ता बनावट दिल्याचे निष्पन्न झालं आहे. घायवळने अहिल्यानरमधील कोतवाली पोलीस स्टेशनच्या हद्दीतील घराचा पत्ता दिला होता. त्याठिकाणी त्याचं कोणतंही अस्तित्व नाही. त्या ठिकाणी कधीही राहत नव्हता. शासन आणि पासपोर्ट विभागाची फसवणूक करून पासपोर्ट मिळवला आहे'.

'त्याने अनेक बाबी लपवून पासपोर्ट मिळवला आहे. या संपूर्ण प्रकरणाची चौकशी पोलीस करत आहेत. पासपोर्ट मिळवताना त्याने काय केलं, याचाही तपास पोलिसांकडून केला जात आहे. मात्र, लंडनला पळालेल्या निलेश घायवळला कधी अटक करणार, ही बाब अद्याप गुलदस्त्यात आहे.