चंद्रपूरचा गांधी चौक बनला आंदोलनाचा आखाडा

चंद्रपूर : चंद्रपूरच्या गांधी चौकात आज जबरदस्त राजकीय धुमश्चक्री बघायला मिळाली. स्थानिक अपक्ष आमदार किशोर जोरगेवार यांच्या विरोधात भाजपने जोरदार निदर्शने केली. याचे कारण ठरले ते अपक्ष आमदारांच्या यंग चांदा ब्रिगेड कार्यकर्त्यांनी सत्ताधारी भाजप आणि मनपाविरुद्ध पुकारलेले 'दे धक्का आंदोलन'. (Gandhi Chowk of Chandrapur became the arena of agitation)

हे देखील पहा -

मनपातील गैरव्यवहारांच्या विरोधात आज आमदार जोरगेवार यांचे आंदोलन असताना भाजपनेही आमदारांविरुद्ध आंदोलनाची तयारी केली. गेल्या काही महिन्यांत मनपातील सत्ताधारी भाजपच्या कारभारातील गैरव्यवहार चव्हाट्यावर आणण्याची घोषणा आमदारांनी केली होती आणि त्यासाठी आज गांधी चौकात आंदोलन घोषित केले. याला उत्तर देण्यासाठी भाजपनेही गांधी चौकात मंडप उभारून आंदोलनाची तयारी केली. आमदारांच्या 200 युनिट मोफत वीज देण्याच्या आश्वासनाची आठवण करून देण्यासाठी भाजपने हे आंदोलन केले.

आज सकाळपासून दोन्ही आंदोलकांनी गांधी चौकात अवैध भाषण मंडप उभारले होते. वाढता तणाव बघता पोलिसांनी कोरोना नियमावलीचा आधार घेत हे मंडप काढून टाकण्याची कृती केली. भाजपने आपले आंदोलन पोलीस बळाचा वापर करून दडपले जात असल्याचा आरोप केला. अपक्ष आमदाराने चंद्रपूरकरांना 200 युनिट वीज मोफत देण्याच्या आश्वासनाच्या विरोधात भाजपने जोरदार नारेबाजी केली. पोलिसांनी महापौर व इतर भाजप नेत्यांसह शेकडो भाजप कार्यकर्त्यांना अटक केली.

Edited By - Akshay Baisane