Shocking : धक्कादायक! वरिष्ठाकडून सतत शरीर सुखाची मागणी, वैतागून परिचारिकेची आत्महत्या, गडचिरोलीतील अधिकार्‍यावर कारवाई

गडचिरोलीतील मुलचेरा तालुक्यातील उपकेंद्रात कार्यरत असलेल्या एका ४५ वर्षीय कंत्राटी परिचारिकेने वरिष्ठ अधिकाऱ्याकडून होत असलेल्या सततच्या शरीर सुखाच्या मागणीला कंटाळून विष प्राशन करत आत्महत्येचा प्रयत्न केला होता. त्या पीडित परिचारिकेवर गडचिरोलीच्या जिल्हा सामान्य रुग्णालयातील अतिदक्षता विभागात उपचार सुरू आहेत. तर पीडित महिलेच्या जबाबावरून सोमवारी उशिरा गडचिरोली पोलिसानी झीरो एफआयआर दाखल करत तालुका आरोग्य अधिकारी डॉक्टर विनोद म्हाशाखेत्रीवर (Doctor Vinod Mhashakhetri ) गुन्ह्या दाखल केला. शिवाय आता या अधिकाऱ्याचे निलंबन करण्यात आले आहे.

मिळालेल्या माहितीनुसार, पीडित महिला तालुक्यातील एका आरोग्य उपकेंद्रात कंत्राटी परिचारिका म्हणून कार्यरत आहे. त्यांची दोन वर्षापासून वेतनवाढ थांबवण्यात आली होती. वेतनवाढीसाठी पीडित महिला तालुका आरोग्य अधिकाऱ्यांना व्हाट्सअप मॅसेजवरून संपर्क करायच्या. मात्र तालुका आरोग्य अधिकाऱ्याने मेसेजद्वारे शरीर सुखाची मागणी केली. गेल्या काही महिन्यांपासून हा प्रकार सुरू असल्याने परिचारिका कर्तव्य पार पाडल्यानंतर घरी गेली. ती प्रचंड तणावात होती. रात्री जेवण करून पतीचा डोळा चुकवून तिने विषारी द्रव प्राशन केले.

पतीच्या ही गोष्ट लक्षात आल्याने पतीने तत्काळ ग्रामीण रुग्णालयात दाखल केले. प्राथमिक उपचारांनंतर महिलेला जिल्हा रुग्णालयात हलवण्यात आले आहे. या प्रकरणातील अश्लील चॅटिंगचे स्क्रीनशॉट्स समोर आल्यानंतर आरोग्य विभागात प्रचंड खळबळ उडाली आहे.परिचारिकेच्या पतीने संबंधित वरिष्ठ अधिकाऱ्यावर पैसे नको, मला तूच पाहिजेस, असा कथित घृणास्पद दबाव टाकल्याचा थेट आरोप केला असून संबंधित तालुका आरोग्य अधिकाऱ्यावर कारवाईची मागणी पीडितेच्या पतीने केली आहे.

दरम्यान या प्रकरणात संबंधित अधिकाऱ्यावर कारवाई करण्यात आली असून त्याला आज निलंबित करण्यात आले असून तो अद्याप फरार असल्याचे वृत्त आहे. या अधिकाऱ्याला काय शिक्षा होणार हे पाहणं महत्त्वाचं ठरेल. या घटनेनंतर आरोग्यव्यवस्था खडबडून जागी झाली असून संतापाचे वातावरण निर्माण झाले आहे. पोलीस या घटनेचा सविस्तर तपास करत आहेत.