Gadchiroli News: न्यायाधीशांना धमकावणाऱ्या पोलीस निरीक्षकास अटक

मंगेश भांडेकर

Gadchiroli News Today: आपल्या विरोधात निकाल दिल्याच्या रागातून न्यायाधीशांना घरी जाऊन धमकवल्या प्रकारी चामोर्शी येथील पोलीस निरीक्षक राजेश खांडवे याला पोलिसांनी अटक केली आहे. कोठडी सुनावल्यानंतर त्याची चंद्रपूरच्या कारागृहात रवानगी करण्यात आली. (Latest Marathi News)

चामोर्शी कृषी उत्पन्न बाजार समितीच्या निवडणुकीदरम्यान 20 एप्रिल रोजी पोलीस (Police) निरीक्षक राजेश खांडवे यांनी अतुल गण्यारपवार यांना बेदम मारहाण केल्याचा आरोप झाला होता. याप्रकरणी चामोर्शीत आंदोलन झाले. मात्र पोलीस निरीक्षकावर कारवाई झाली नाही.

त्यामुळे अतुल गण्यारपवार न्यायालयात गेले. चामोर्शी येथील प्रथम वर्ग न्याय दंडाधिकारी मेश्राम यांनी 20 मे रोजी कलम 294, 324, 326 नुसार राजेश खांडवे यांच्यावर गुन्हा नोंदवण्याचे आदेश दिले होते. त्यामुळे राजेश खांडवे न्यायाधीशांच्या घरी जाऊन त्यांना धमकवल्याचा प्रकार उघड झाला होता. (Gadcharoli News)

या प्रकरणी न्यायाधीश मेश्राम यांनी ही बाब जिल्हा पोलीस अधीक्षकांना अवगत करून गडचिरोली पोलीस ठाण्यात तक्रार दाखल केली. तेव्हा राजेश खांडवे यांच्यावर गुन्ह्याची नोंद करण्यात आली. अखेर 3 जून रोजी पोलीस निरीक्षक राजेश खांडवे याला अटक करण्यात आली.