Shocking : गडचिरोली हादरली! डॉक्टरचा काळा चेहरा समोर; लग्नाचं वचन देऊन तरुणीवर लैंगिक अत्याचार

गणेश शिंगाडे, गडचिरोली

गडचिरोलीमधून धक्कादायक घटना समोर आली आहे. लग्नाचे आश्वासन देऊन एका तरुणीचे लैंगिक शोषण केल्याप्रकरणी आष्टी येथील एका डॉक्टरविरुद्ध गडचिरोली पोलीस ठाण्यात गुन्हा दाखल करण्यात आला आहे. या घटनेमुळे जिल्ह्यात खळबळ उडाली असून नागरिकांमध्ये संतापाची भावना व्यक्त होत आहे.

पोलिसांनी दिलेल्या माहितीनुसार, आष्टी येथील डॉक्टर विजन प्रधान सरकार याने संबंधित तरुणीशी विवाह करण्याचे आश्वासन दिले होते. या आश्वासनावर विश्वास ठेवून तरुणीने त्याच्याशी संबंध ठेवले. मात्र, कालांतराने डॉक्टरने लग्न करण्यास टाळाटाळ सुरू केली. त्यानंतर त्याने लग्नाला नकार दिल्याचा आरोप पीडितेने आपल्या तक्रारीत केला आहे. पीडित तरुणीने पोलिसांकडे धाव घेत घडलेला प्रकार सांगितल्यानंतर तक्रारीच्या आधारे आरोपी डॉक्टरविरुद्ध भारतीय न्याय संहितेच्या संबंधित कलमान्वये गुन्हा दाखल करण्यात आला.

पोलिसांनी तत्काळ तपासाची चक्रे फिरवत आरोपीला अटक केली आहे. न्यायालयात हजर करण्यात आल्यानंतर त्याला न्यायालयीन कोठडी सुनावण्यात आल्याची माहिती पोलिसांकडून देण्यात आली. या प्रकरणात पीडित तरुणीने डॉक्टरने लग्नाचे आमिष दाखवून वारंवार शारीरिक संबंध ठेवले आणि त्यानंतर दिलेले आश्वासन मोडल्याचा गंभीर आरोप केला आहे.

पोलिसांनी तक्रारीची दखल घेत सखोल तपास सुरू केला असून घटनेशी संबंधित सर्व बाबींची चौकशी केली जात आहे. दरम्यान, गडचिरोली जिल्ह्यात नुकत्याच घडलेल्या अल्पवयीन मुलीवरील अत्याचाराच्या घटनेची चर्चा सुरू असतानाच आणखी एक गंभीर प्रकरण समोर आल्याने नागरिकांमध्ये चिंता व्यक्त केली जात आहे. महिलांच्या सुरक्षेचा प्रश्न पुन्हा ऐरणीवर आला असून अशा घटनांवर कठोर कारवाई करण्याची मागणी विविध स्तरांतून होत आहे. या प्रकरणाचा पुढील तपास गडचिरोली पोलीस करत असून तपासानंतर अधिक माहिती समोर येण्याची शक्यता आहे.