शेवटची इच्छा अपूर्णच राहिली; भरधाव वाहनाने चिरडून वडिलांचा मृत्यू,भीषण अपघातामुळे बापलेकींची ताटातूट

सागर निकवाडे, साम टीव्ही

नंदूरबारमध्ये हृदय पिळवटून टाकणारी घटना घडली आहे. मुलींना खाऊ देण्यासाठी निघालेल्या वडिलांचा भीषण अपघातात मृत्यू झाला आहे. भीषण अपघाताने बापलेकी तातातूट झाली आहे. वडिलांच्या अकाली मृत्यूने नंदूरबारमध्ये हळहळ व्यक्त करण्यात येत आहे.

नंदूरबारच्या सुरत-धुळे महामार्गावर बंधारपाड्याचा घरातील कर्ता पुरुष अपघातात जागीच ठार झाला. पत्नीच्या डोळ्यादेखत पतीचा जागीत अंत झाला. ३७ वर्षीय मनेष गावीत असे मृत्यू झालेल्या व्यक्तीचे नाव आहे. या अपघातात पत्नी किरकोळ जखमी झाली आहे.

नेमकं काय घडलं?

नंदूरबारच्या पानबारा येथील आश्रमशाळेत शिकणाऱ्या तीन मुलींना भेटण्यासाठी जोडपे निघाले होते. मुलींना खाऊ देण्यासाठी निघालेल्या दुचाकीवरील वडिलांना सरपणी नदी पुलाजवळ भरधाव वाहनाने उडवले. अपघातानंतर अज्ञात वाहन चालक फरार झाला. या प्रकरणी विसरवाडी पोलिसांत गुन्हा दाखल करण्यात आला.

शेतकरी आणि रिक्षाचालक असलेल्या मनेष यांच्या निधनाने कुटुंबाचा आधारवड हरपल्याची भावना व्यक्त केली जात आहे. या घटनेमुळे तीन मुलींच्या डोक्यावरचं छत्र हरपलं असून संपूर्ण जिल्ह्यात हळहळ व्यक्त केली जात आहे.

साताऱ्यात सालपे घाटात ट्रकला भीषण आग

सातारा लोणंद मार्गावरील सालपे घाटात ट्रकला भीषण आग लागली. यामुळे तब्बल एक तास वाहतूक कोंडी बघायला मिळाली. या दुर्घटनेत कोणतीही जीवितहानी झाली नसली, तरी केसीपीएल कंपनीचा ट्रक या दुर्घटनेत जळून खाक झाला आहे. या घटनेची माहिती मिळताच वाठार स्टेशन पोलीस ठाण्याचे कर्मचारी आणि शरयू साखर कारखान्याचा अग्निशामक बंब दाखल झाल्यानंतर आग आटोक्यात आणण्यात आली.