Vishnu Manohar : प्रसिद्ध शेफ विष्णू मनोहरांच्या फेसबुक पेजवरून अश्लील पोस्ट; भर पत्रकार परिषदेत ढसाढसा रडले

पराग ढोबळे, साम टीव्ही

प्रसिद्ध व्यक्तींच्या फेसबुक अकाऊंट हॅक होण्याच्या घटनेत दिवसेदिवस वाढ होऊ लागली आहे. फेसबुक अकाऊंट करून इतरांची आर्थिक फसवणूक केली जाते. अकाऊंट हॅक होण्याच्या घटना वाढल्याने प्रसिद्ध व्यक्तींना नाहक त्रास सहन करावा लागतो. तर काहींचं आर्थिक नुकसान देखील होतं. असाच प्रकार नागपुरातील प्रसिद्ध शेफसोबत घडला आहे. प्रसिद्ध शेफ विष्णू मनोहर यांचं फेसबुक अकाऊंट हॅक झाल्याचे समोर आलं आहे. त्यांच्या नावाने असणाऱ्या एका 'मास्टर रेसिपी बाय विष्णू मनोहर' या फेसबुक अकाऊंटला हॅक करून त्यावर अश्लील पोस्ट करण्यात आल्याचे समोर आलं आहे.

फेसबुक अकाऊंट हॅक झाल्याचे समजताच विष्णू मनोहर यांनी या सगळ्या संदर्भात सायबर पोलिसांना तक्रार केली. मात्र दहा ते बारा दिवस लोटूनही अद्यापही अकाउंट रिकव्हर करण्यात न आल्यामुळे त्या पोस्ट कायम सुरू आहेत. या पोस्टचा विष्णू मनोहर यांना मानसिक त्रास सहन करावा लागत आहे. या संदर्भात नागपूर, बंगळूर, मुंबई पुणे आणि अमेरिकेतही यासंदर्भात तक्रारी केली आहे.

विष्णू मनोहर यांनी मेटासोबतही संपर्क साधला. मात्र अद्यापपर्यंत अकाऊंट रिकव्हर होऊ शकले नाही. 2000 रेसिपी असलेल्या अकाऊंटवर लाखो फॉलॉवर्स होते. मात्र गेल्या दहा ते बारा दिवसांमध्ये फॉलोवर्सची संख्या घटली आहे. फॉलोवर्स पेजला सोडून जात आहेत.

तसेच अनेक लोक त्यांना फोनद्वारे मेसेजद्वारे संदेश पोहोचवत आहे. अशा पद्धतीचे अश्लील पोस्ट का करत आहेत, असे प्रश्नही विचारत आहेत. तसेच या लिंकवर क्लिक केल्यास त्यांचे अकाऊंट हॅक होऊ शकते. त्यामुळे चाहत्यांनी या लिंकवर क्लिक करू नये, असे आवाहन विष्णू मनोहर यांच्याकडून करण्यात आले.