अमावस्येला पूजा करून महिलेसोबत अश्लील कृत्य, भोंदू भोसलेचं भयंकर कृत्य, सोलापूर हादरले

Manohar Bhosale sexual assault case : सोलापूर जिल्ह्यातून एक मोठी आणि धक्कादायक बातमी समोर येत आहे. प्रसिद्ध भोंदूबाबा मनोहर भोसलेविरुद्ध करमाळा पोलीस ठाण्यात आता तब्बल सहावा गुन्हा दाखल झाला आहे. एका महिलेने दिलेल्या तक्रारीनुसार, लैंगिक अत्याचाराच्या विरोधात हा गुन्हा नोंदवण्यात आला आहे. आरोग्याच्या तक्रारी दूर करण्याचे आमिष दाखवून, तीन अमावस्यांना विशेष पूजा घालण्याच्या बहाण्याने मनोहर भोसले याने पैसे उकळले आणि महिलेसोबत अश्लील कृत्य केल्याचा धक्कादायक प्रकार समोर आला आहे.

गुन्हा दाखल झाल्यानंतर पोलिसांनी मनोहर मामा भोसलेच्या विविध आश्रमांवर छापे टाकले असून, तिथून तपासाला गती देणारे काही महत्त्वाचे पुरावे हस्तगत केले आहेत. या संपूर्ण प्रकरणाचे गांभीर्य लक्षात घेऊन ५ वरिष्ठ पोलीस अधिकाऱ्यांची एक विशेष तपास समिती म्हणजेच SIT (Special Investigation Team) स्थापन करण्यात आली आहे. या समितीमार्फत मनोहर भोसलेची कसून चौकशी सुरू आहे.

३ कोटींचे संशयास्पद व्यवहार

या चौकशी दरम्यान भोंदू मनोहर भोसलेचे मोठे आर्थिक साम्राज्य देखील समोर आले आहे. पोलिसांनी त्याच्या २० हून अधिक बँक खात्यांची तपासणी केली असता, त्यामध्ये तब्बल ३ कोटी रुपयांपेक्षा जास्त रक्कमेचे संशयास्पद व्यवहार झाल्याचे उघड झाले आहे. या पैशांचा स्त्रोत काय आणि हे पैसे कुठून आले, याचा शोध आता 'SIT' घेत आहे.

मनोहर भोसलेविरुद्ध आधी ५ गुन्हे दाखल होते, त्यात आता २ दिवसांपूर्वी करमाळा पोलीस स्टेशनमध्ये सहावा गुन्हा दाखल करण्यात आला आहे. एका महिलेने तिच्या नातेवाईकांच्या आरोग्याच्या समस्येसाठी संपर्क साधला असता, दोन अमावस्यांना पूजा करण्यात आली आणि तिसऱ्या अमावस्येला आल्यावर तिच्यासोबत अश्लील कृत्य करण्यात आल्याची तक्रार आहे, अशी माहिती अप्पर पोलीस अधीक्षक अतुल झेंडे यांनी दिली. गोटी येथील मुख्य आश्रम अनधिकृत आणि बेकायदेशीर (Illegal) असल्याने ग्रामपंचायतीच्या ठरावानुसार तो सील करण्यात आला आहे. याशिवाय पुणे, गाणगापूर आणि कोल्हापूर येथील इतर आश्रमांवरही टीमने जाऊन पंचनामा केला असून तिथून काही पुरावे हस्तगत केले आहेत, असेही त्यांनी सांगितले.