Cabinet Meeting: फडणवीस सरकारने घेतले ४ मोठे निर्णय, मुंबई-कोल्हापूर आणि सिंधुदुर्गला होणार फायदा

Summary -

• फडणवीस सरकारच्या मंत्रिमंडळ बैठकीत ४ मोठे निर्णय घेण्यात आले.

• मुंबईतील टाटा आयुर्वेदिक कर्करोग रुग्णालयासाठी मुद्रांक शुल्क माफी.

• कोल्हापुरात महिला सहकारी वसाहतीसाठी २.५० हेक्टर जमीन मंजूर.

• सिंधुदुर्गमधील शासकीय जमिनीवरील अतिक्रमण नियमित करण्यास मान्यता.

• वैद्यकीय शिक्षण विभागातील १७ कर्मचाऱ्यांची सेवा नियमित.

मुख्यमंत्री देवेंद्र फडणवीस यांच्या अध्यक्षतेखाली मंत्रिमंडळाची बैठक पार पडली. या बैठकीमध्ये ४ महत्वाचे आणि मोठे निर्णय घेण्यात आले. आजच्या बैठकीमध्ये महसूल, नोंदणी व मुद्रांक शुल्क विभाग आणि वैद्यकीय शिक्षण व औषधी द्रव्ये विभाग यासाठी निर्णय घेण्यात आले. या निर्णयाचा फायदा मुंबईसह कोल्हापूर आणि सिंधुदुर्ग जिल्ह्याला होणार आहे.

मंत्रिमंडळाच्या बैठकीमध्ये नेमके काय निर्णय झाले?

१) मुंबईतील टाटा मेमोरिअल सेंटरच्या एकात्मिक आयुर्वेदिक कर्करोग दवाखाना आणि संशोधन केंद्रात १०० खाटांचे रुग्णालय उभारण्यासाठी मुद्रांक शुल्क माफ करण्यात आले आहे. (महसूल, नोंदणी व मुद्रांक शुल्क विभाग)

२) कोल्हापुरातील सावित्रीबाई फुले महिला सहकारी औद्योगिक वसाहत लिमीटेड संस्थेस कसबा करवीर, बी वॉर्ड, कोल्हापूर येथील गट क्र.६९७/३/६ मधील २ हे. ५० आर जमीन देणार असल्याचा निर्णय घेण्यात आला. (महसूल, नोंदणी व मुद्रांक शुल्क विभाग)

३) सिंधुदुर्ग जिल्ह्यामधील मौजे वेंगुर्ला - कॅम्प गवळीवाडा येथील शासकीय जमिनीवरील अतिक्रमण नियमानुकूल करण्यास मान्यता देण्यात आली. (महसूल, नोंदणी व मुद्रांक शुल्क विभाग)

४) राज्यातील शासकीय वैद्यकीय महाविद्यालय आणि रुग्णालयातील गट-क (तांत्रिक) संवर्गातील विविध पदावर २९ दिवस तत्त्वावर कार्यरत १७ कर्मचाऱ्यांची तात्पुरती सेवा नियमित करण्यास मान्यता देण्यात आली. (वैद्यकीय शिक्षण व औषधी द्रव्ये विभाग)