निवडणूक प्रशासनाची घरावर धाड; शिंदे गटाच्या बड्या नेत्याला हृदयविकाराचा झटका

सुशील थोरात, साम टीव्ही

अहिल्यानगर महानगरपालिकेच्या निवडणुकीमुळे राजकीय घडामोडींना वेग आला आहे. अहिल्यानगरमध्ये महायुतीमध्ये लढत पाहायला मिळत आहे. नगरमध्ये भाजप आणि अजित पवारांच्या राष्ट्रवादीची युती झाली आहे. तर शिंदे गट स्वबळावर निवडणूक लढत आहेत. या निवडणुकीदरम्यान निवडणूक प्रशासनाने शिंदे गटाच्या नेत्याच्या घरावर धाड टाकली. त्यानंतर शिंदे गटाच्या बड्या नेत्याला हृदयविकाराचा झटका आल्याची घटना घडली.

अहिल्यानगर महानगरपालिका निवडणुकीच्या पार्श्वभूमीवर प्रभाग क्रमांक १५ मध्ये घडलेल्या घटनेने संपूर्ण शहराचं राजकीय वातावरण तापलंय. शिंदे गटाचे उमेदवार आणि जिल्हाप्रमुख अनिल शिंदे यांना प्रशासकीय कारवाईच्या तीव्र मानसिक दबावामुळे थेट हृदयविकाराचा झटका आल्याची घटना समोर आलीये. या घटनेने मोठी राजकीय खळबळ उडाली.

मिळालेल्या माहितीनुसार, आगरकर मळा येथील अनिल शिंदे यांच्या निवासस्थानी निवडणूक प्रशासनाच्या पथकाने सायंकाळी धाड टाकली. या कारवाईदरम्यान मोठ्या प्रमाणात पोलीस बंदोबस्त होता.

पोलीस बंदोबस्तासहित वरिष्ठ अधिकारी आणि प्रशासकीय यंत्रणा घरात दाखल झाल्याने वातावरण तणावपूर्ण झालं. यावेळी कोणतीही पूर्वसूचना न देता झालेल्या या कारवाईमुळे उमेदवार शिंदे यांच्यावर प्रचंड मानसिक ताण आला. त्यानंतर या तणावातून त्यांना हृदयविकाराचा झटका आल्याची माहिती समोर आलीये. याबाबत अनिल शिंदे यांची पत्नी शीला शिंदे यांनी प्रशासनावर गंभीर आरोप केलेत.

शिंदे गटाचा आरोप

'राजकीय दबावातून हा प्रकार सुरू आहे. सत्ताधाऱ्यांना आपला पराभव समोर दिसू लागल्याने त्यांनी हा खेळ सुरू केला आहे, असा आरोप शिवसेनेचे संपर्क प्रमुख संजीव भोर यांनी केलाय.