'आईवरून शिव्या देतोस..' मित्राने मित्रालाच संपवलं; चाकूने वार करत हत्या, नंतर घर पेटवलं

कोल्हापुरातून एक धक्कादायक बातमी उघडकीस आली. आईवरून शिवी दिल्याकारणामुळे मित्राने मित्राचा खून केला आहे. गळा चिरून हत्या केली असल्याची माहिती आहे. या हत्या प्रकरणी संशयित आरोपीला पोलिसांनी बेड्या ठोकल्या आहेत. पोलिसांनी अवघ्या ४ तासांतच खूनाचा उलगडा केला आहे. या घटनेनंतर परिसरात खळबळ उडाली आहे.

हा धक्कादायक प्रकार कोल्हापूरच्या हनुमाननगर येथे घडला आहे. चंद्रकांत केदारी शेळके (वय वर्ष ७३) असे आरोपीचे नाव आहे. त्यानं मोहन सूर्यकांत पोवार (वय वर्ष ७०) याची गळा चिरून निर्घृण हत्या केली. मृत व्यक्तीचे आरोपीसोबत काही वेळ शाब्दिक बाचाबाची झाली होती. मृत व्यक्तीने आरोपीला शिवीगाळ केली होती.

याच रागातून आरोपीनं मृत व्यक्तीला मारहाण केली. नंतर रागाच्या भरात चाकूने गळा चिरला. या हल्ल्यात वृद्ध व्यक्तीचा मृत्यू झाला. नंतर मृत व्यक्ती उपस्थित असलेल्या खोलीला आग लावली. याप्रकरणाची माहिती पोलिसांना मिळताच त्यांनी घटनास्थळी धाव घेतली. तसेच तपासाला सुरूवात केली.

तपासात चंद्रकांत केदारी शेळके यानं खून केल्याची माहिती समोर आली आहे. या प्रकरणी पोलिसांनी आरोपीला अटक केली आहे. जुना राजवाडा पोलीस आणि स्थानिक गुन्हे अन्वेषण शाखेनं संयुक्त कारवाई करत या प्रकरणाचा छडा लावला. या प्रकरणाची पोलिसांकडून अधिक तपास सुरू आहे.