संजय गडदे, साम टीव्ही
मुंबईच्या कांदिवलीत राहणाऱ्या मराठी कुटुंबाला शिवसेनेकडून न्याय मिळाला आहे. शिवसेनेकडून मराठी माणसाचं दुकान हडप करणाऱ्या लालसिंग राजपुरोहितचं पक्षातून निलंबन करण्यात आलं. शिवसेनेच्या मदतीने मराठी माणसाला त्यांचं दुकान परत मिळालं. दुकान परत मिळाल्याने पै कुटुंबाने उपमुख्यमंत्री एकनाथ शिंदेंचे आभार मानले.
मुंबईच्या मालाड-कांदिवली-चारकोपचे विभागप्रमुख लालसिंग राजपुरोहित याची शिवसेनेतून हकालपट्टी करण्यात आली आहे. राजपुरोहित याने बळकावलेले दुकान परत मिळाल्याने कांदिवलीमधील दत्ताराम पै आणि सुषमा पै या मराठी दाम्पत्याने शिवसेनेचे मुख्य नेते आणि राज्याचे उपमुख्यमंत्री एकनाथ शिंदे यांचे आभार मानले. पै कुटुंबावरील अन्यायाची दखल घेऊन उपमुख्यमंत्री शिंदे यांनी लालसिंग राजपुरोहितवर कारवाई करण्याचे आदेश पोलिसांना दिले.
शिवसेना शिस्तभंग समितीच्या शिफारसीनुसार शिवसेना मुख्यनेते एकनाथ शिंदे यांच्या आदेशाने विभागप्रमुख लालसिंग राजपुरोहित याला पक्षातून निलंबित करण्यात आल्याचे निवेदन शिवसेना सचिव संजय मोरे यांनी जारी केले आहे. शिवसेना पक्ष हिंदुह्रयसम्राट बाळासाहेब ठाकरे यांच्या विचारांवर चालणारा आहे. एखाद्या घटनेत पक्षाचा पदाधिकारी जर चुकीचा वागला असेल. त्याने कोणावर अन्याय केला असेल तर त्याला कुठल्याही परिस्थितीत पाठिशी घातले जाणार नाही, हा संदेश पक्षाचे मुख्य नेते एकनाथ शिंदे यांनी आपल्या कृतीतून दिल्याचे उपनेत्या आणि प्रवक्त्या शीतल म्हात्रे म्हणाल्या.
राजपुरोहित याची पक्षातून हकालपट्टी केल्यानंतर त्याने हडप केलेले दुकान शिवसेनेचे माजी नगरसेवक एकनाथ हुंडारे आणि विभाग प्रमुख वैभव भराडकर यांनी पै कुटुंबाच्या स्वाधीन केले. दुकानाची चावी पुन्हा मिळाल्याने दत्ताराम पै आणि सुषमा पै भावूक झाले होते. या प्रकरणाची दखल घेऊन कारवाईचे आदेश देणाऱ्या उपमुख्यमंत्री एकनाथ शिंदे यांचे पै कुटुंबाने यावेळी आभार मानले.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.