घराला अचानक हादरे, मांडणीवरील भांडी पडली; भूकंपाच्या धक्क्याने लोक रस्त्यावर धावत सुटले

महाराष्ट्रातील मराठवाड्यातील काही जिल्ह्यांना शनिवारी सकाळी भूकंपाचे हादरे बसले. भूकंपाच्या तीव्र धक्क्याने घर आणि पत्रे हादरले. तीव्र स्वरुपाच्या हादऱ्याने अनेकांच्या स्वयंपाकघरातील मांडणीवरील भांडी पडली. काही लोक भूकंपाच्या धक्क्याने घराबाहेर पळाले. महिला,पुरुष आणि लहान मुले घाबरून एका ठिकाणी जमा झाले. तर काही जण धावताना दिसले.

काही दिवसांपूर्वी उत्तर भारतातील दिल्ली-एनसीआर, जम्मू आणि काश्मीर आणि चंदीगडसह काही भागात भूकंपाचे धक्के जाणवले होते. त्या भूकंपाचा केंद्रबिंदू अफगाणिस्तानात होता. जम्मू आणि काश्मीरमधील उधमपूर, पूंछ आणि काश्मीर खोऱ्यातही भूकंपाचे धक्के जाणवले होते. त्यानंतर आता महाराष्ट्रातील काही जिल्ह्यात भूकंपाचे धक्के जाणवले आहेत. तर या भूकंपाची रिस्टर स्केलवर 4.7 तीव्रतेची नोंद झाली आहे.

मराठवाड्यातील परभणी, हिंगोली, यवतमाळ आणि नांदेड जिल्ह्यातील काही भागात भूकंपाचे तीव्र धक्के जाणवले आहेत. हिंगोली शहर, वसमत, कळमनुरी भागातील लोक भूकंपाच्या धक्क्याने नागरिक भयभीत झाले. मराठवाड्यात शनिवारी सकाळी ८.४६ मिनिटाला भूकंपाचे तीव्र धक्के जाणवल्याची माहिती हाती आली आहे.

भूकंपाचे धक्के जाणवल्यानंतर काही नागरिक घराबाहेर आले. यावेळी काही लहान मुले भीतीने इतरत्र पळताना दिसली. भूकंपाचे धक्के बसल्यानंतर नागरिक भयभीत होऊन रस्त्यावर एकत्र जमा झाले. मराठवाड्यात जाणवलेल्या भूकंपाच्या धक्क्याचा केंद्रबिंदू नेमका कुठे होता, याची माहिती अद्याप समोर आलेली नाही.

मराठवाड्यात जाणवलेल्या भूकंपाच्या धक्क्याने किती नुकसान झालं, याची माहिती हाती आलेली नाही. या भूकंपाच्या हादऱ्याने अद्याप कोणतीही जिवीतहानी झालेली नाही. प्रशासन विविध जिल्ह्यातील परिस्थितीवर लक्ष ठेवून आहे. नागरिकांनी घाबरून जाऊ नये आणि अफवांवर विश्वास ठेवू नये, असं आवाहन प्रशासनाकडून करण्यात आले. दरम्यान, भारतात गेल्या ४ महिन्यात जवळपास ३ हून अधिकवेळा भूकंपाचे धक्के जाणवले आहेत.