Dombivli : बनावट कागदपत्रांच्या आधारे जामीन देणारी टोळीचा पर्दापाश; पोलिसांची मोठी कारवाई

Dombivli Crime News : विविध गुन्ह्यात शिक्षा भोगत असलेल्या आरोपींना बोगस कागदपत्रांच्या आधारे जामीन मिळवून देणाऱ्या टोळीला पोलिसांनी पर्दापाश केला आहे. डोंबिवलीच्या (Dombivli) महात्मा फुले पोलिसांनी या टोळीला बेड्या ठोकल्या आहेत. यात एक पुरुष आणि तीन महिलांचा समावेश आहे. तर या टोळीला बोगस कागदपत्र तयार करून देणाऱ्या इतर दोन आरोपींचा शोध सुरू आहे.

मिळालेल्या माहितीनुसार, विविध गुन्ह्यात शिक्षा भोगत असलेल्या आरोपींना जामीनासाठी वेळेवर कागदपत्र मिळत नसल्याने या आरोपींची शिक्षा लांबते. अशा आरोपींच्या नातेवाईकांना हेरून त्यांना जामीनासाठी आवश्यक कागदपत्र उपलब्ध करून देत त्यांच्याकडून २५ ते ३० हजार रुपये उकळणारी टोळी कल्याण न्यायालयाच्या परिसरात कार्यरत असल्याची माहिती महात्मा फुले पोलिसांना मिळाली होती.

मिळालेल्या माहितीच्या आधारे पोलिसांनी कल्याण न्यायालय परिसरात सापळा रचून पोलिसांनी सिद्धार्थ नागवेकर (२९), जस्मित कौर उर्फ डिंपल करतारसिंग गील (२६),ममता अनुपम हजरा (२८), गितिका सागर उदासी (२४) अशा चार आरोपींना अटक केली आहे. तर या आरोपींना बोगस कागदपत्र तयार करून देणाऱ्या दोघांचा शोध सुरू आहे.

उल्हासनगरमध्ये राहणारा सिद्धार्थ नागवेकर हा इतर तीन आरोपींबरोबर बनावट नाव पत्ता वापरून रेशनकार्ड, आधारकार्ड तसेच ग्रामपंचायतीच्या घरपट्टी तयार करून या बनावट कागदपत्रांच्या आधारे कल्याण न्यायालयात आरोपींना जामीन देत असे. गंभीर गुन्ह्यातील आरोपींना ३० हजार रुपयात हे कागदपत्र उपलब्ध करून दिले जात असत. महात्मा फुले पोलिसांनी या आरोपींना कल्याण न्यायालयाच्या आवारातून रंगेहाथ अटक केल्याची माहिती महात्मा फुले पोलीस ठाण्याचे पोलिस निरीक्षक प्रदीप पाटील यांनी दिली.