Dombivali : निळजे परिसरात दोन कोटींचे एमडी ड्रग्स जप्त; मानपाडा पोलिसांनी कारवाई, परदेशी ड्रस तस्कराला अटक

अभिजित देशमुख 
डोंबिवली : डोंबिवली जवळील कोणी निळजे परिसरातील हायप्रोफाईल वस्ती पुन्हा एकदा चर्चेत आली आहे. या परिसरात मानपाडा पोलिसांनी छापा टाकत कारवाई केली आहे. या कारवाईत सुमारे दोन कोटी रुपयांचे एमडी ड्रग्स जप्त करण्यात आले आहे. तर एमडी ड्रग विक्रीसाठी आलेल्या परदेशी ड्रग्स तस्कराला देखील पोलिसांनी ताब्यात घेतले आहे.  

डोंबिवलीच्या निळजे परिसरातील हायप्रोफाईल सोसायटीमध्ये सदरची कारवाई करण्यात आली आहे. या सोसायटीच्या परिसरात एक परदेशी तस्कर एमडी ड्रग्स घेऊन येणार असल्याची माहिती मानपाडा पोलिसांना मिळाली होती. या माहितीच्या आधारे पोलिसांनी या ठिकाणी सापळा रचला. याच गावातील तलावाजवळ एका रोडवर एक परदेशी इसम संशयास्पद रित्या फिरताना पोलिसांना आढळला. परदेशी नागरिकाला बेड्या ठोकल्या. इसा बकायोका असे या परदेशी नागरिकाचे नाव असून तो मूळचा दक्षिण आफ्रिकेतील असल्याची माहिती समोर आली आहे. 

आठवडाभरापूर्वीच २ कोटींचे ड्रग्स जप्त   

या कारवाईदरम्यान पोलिसांनी त्याच्या जवळून सुमारे २ कोटी १२ लाख रुपये किमतीचे दीड किलो एमडी ड्रग्स मानपाडा पोलिसांनी जप्त केले आहेत. आठवडाभर पूर्वीच मानपाडा पोलिसांनी खोणी पलावा येथील एका हायप्रोफाईल सोसायटीत छापा टाकत सुमारे दोन कोटींचे जप्त केले होते. या प्रकरणी चौघा जणांना अटक देखील करण्यात आली होती. त्या पाठोपाठ पुन्हा निळजे येथील हाय प्रोफाईल परिसरात परदेशी ड्रग्स तस्कराला बेड्या ठोकण्यात आल्या आहेत. 

ड्रग्स तस्करीची मोठी साखळी 

पोलिसांनी ताब्यात घेतलेल्या ईसा बकायोका हा मूळचा दक्षिण आफ्रिका येथील राहणारा असल्याची माहिती समोर आली आहे. तो सध्या डोंबिवली निळजे गाव परिसरात राहत होता. तर इसा याने हे ड्रग्स कुठून आणले?, तो ड्रग्स कोणाला विकणार होता? याचा तपास मानपाडा पोलीस करत आहेत. दरम्यान आठवडाभरात दुसरी डोंबिवली मधील ड्रग्स तस्करीचे इंटरनॅशनल कनेक्शन पुन्हा एकदा समोर आलं आहे. या ड्रग्स तस्करीच्या धंद्यात इंटरनॅशनल कनेक्शन असून आणखी काही साथीदार असल्याची शक्यता पोलिसांनी वर्तवली असून पोलीस या साथीदारांचा शोध घेत आहेत .