Sakri Accident News : वाढदिवसाच्या दिवशीच घेतला अखेरचा निरोप; गावी जाताना अपघात

कासारे (धुळे) : बेहेड (ता. साक्री) येथील उमेश (सोनू) तोरवणे व सुमीत पवार हे दोघे दुचाकीवरून जात होते. सणसवाडी हद्दीत या दोघांना पुण्याच्या (Pune) दिशेने जाणाऱ्या कारने जोरदार धडक दिली. दुचाकीला कारची धडक बसल्याने दुचाकीवरील सोनू ठार झाला, तर त्याचा मित्र गंभीर जखमी झाला. हा अपघात (Accident) रविवारी मध्यरात्री घडला. (Tajya Batmya)

सोनू नोकरीनिमित्त पुणे येथे बहिणीकडे राहात होता. सोमवारी त्याचा वाढदिवस असल्यामुळे गावी (बेहेड, ता. साक्री) यायचे होते. मित्राला घेऊन दुचाकीवरून पुणे येथे जात असताना अपघात घडला. सोनू साधारण शेतकरी कुटुंबातील दोन विवाहित बहिणींचा एकुलता भाऊ होता. सोनूच्या अशा जाण्याने संपूर्ण गाव सुन्न झाले आहे. वाढदिवसाच्याच दिवशी निरोप देण्याचा प्रसंग आई-वडील, बहिणी, आप्तेष्टांवर येऊन ठेपला.

सोनूचा मित्र सुमीत विकास पवार (रा. कोरेगाव भीमा, ता. शिरूर) हा गंभीर जखमी झाला आहे. याप्रकरणी गोकूळ भीमराव जाधव (रा. आळंदी फाटा, लोणीकंद, ता. हवेली) यांनी शिक्रापूर पोलिस ठाण्यात याबाबत फिर्याद दिली असून, कारचालक सुनील ऋषिकेश बेंडभर (रा. पिंपळे जगताप, ता. शिरूर) याच्यावर गुन्हा दाखल केला आहे. पोलिस निरीक्षक प्रमोद क्षीरसागर यांच्या मार्गदर्शनाखाली पोलिस नाईक राकेश मळेकर पुढील तपास करत आहेत.