पोलीस प्रशिक्षण केंद्रात 1 कोटी 55 लाखांचा महाघोटाळा; चार लोकसेवकांना ठोकल्या बेड्या

भूषण अहिर, साम प्रतिनिधी

कायद्याचे रक्षण करणाऱ्या पोलिसांना प्रशिक्षण दिले जाते, त्याच संस्थेत कोट्यवधींचा घोटाळा झाला आहे. धुळ्यातील पोलीस प्रशिक्षण केंद्रात कार्यरत असलेल्या चार लोकसेवकांनी संगनमत करून तब्बल 1 कोटी 55 लाख रुपयांचा शासकीय निधी लाटल्याचे उघडकीस आले आहे. याप्रकरणी प्रशासकीय वर्तुळात मोठी खळबळ उडाली आहे.

याप्रकरणी धुळे शहर पोलीस ठाण्यात भारतीय न्याय संहितेच्या विविध कलमांन्वये फसवणूक आणि शासकीय रकमेच्या अपहार केल्याप्रकरणी गुन्हा दाखल करण्यात आला आहे. यातील चारही संशयित आरोपींना अटक करण्यात आली आहे. डिसेंबर 2024 ते एप्रिल 2026 या कालावधीत या कर्मचाऱ्यांनी ऑनलाइन 'सेवार्थ' वेतन प्रणालीत बेकायदेशीरपणे फेरफार करत, कोणतेही देय नसताना स्वतःच्या बँक खात्यांमध्ये खोटा बेसिक एरियर्स जमा करून शासनाची मोठी फसवणूक केली आहे.

जिल्हा पोलीस अधीक्षक विशाल आनंद यांनी या गुन्ह्याची व्याप्ती आणि गांभीर्य लक्षात घेता पुढील सखोल तपास आता धुळ्याच्या आर्थिक गुन्हे शाखेकडे वर्ग केला असून, पोलीस उपअधीक्षकांच्या नेतृत्वाखालील पथक या प्रकरणाचा तपास करत आहे.

वाशिममधील ९ पोलिसांना जन्मठेपेची शिक्षा

वाशिममधील ९ पोलिसांना न्यायालयाने जन्मठेपेची शिक्षा सुनावली. या घटनेमुळे पोलिस दलात एकच खळबळ उडाली. पोलिसांनी कस्टडीमध्ये असलेल्या आरोपीला बेदम मारहाण केली होती. या मारहाणीत तरुणाचा मृत्यू झाला होता. यात दोषी असलेल्या ९ पोलिसांना आज न्यायालयाने शिक्षा सुनावली. सर्व दोषी पोलिसांना जन्मठेपेची शिक्षा वाशिम जिल्हा सत्र न्यायालयाने सुनावली आहे.

वाशिम जिल्हा सत्र न्यायालयाचे न्यायाधीश जयसिंग झपाटे यांनी हा ऐतिहासिक निकाल दिला. रिसोड पोलीस ठाण्यामध्ये चोरीच्या गुन्ह्यात संशयित असलेला आरोपी बेग्या पवार याचा पोलिसांच्या मारहाणीत मृत्यू झाला होता. बेग्या पवार याच्यावर यापूर्वी कोणताही गुन्हा दाखल नसल्याची त्याच्या आई-वडिलांनी माहिती दिली आहे. बेग्या पवार हा हिंगोली जिल्ह्यातील सेनगाव तालुक्यातल्या वाढोणा येथील पारधी समाजाचा होता. १० मे २०११ रोजी पोलीस कोठडीत त्याचा मृत्यू झाला होता.