Dhule News : पांझरा नदीत बुडालेल्या तरुणाचा अखेर लागला शोध; वार कुंडाणे शिवारात आढळून आला मृतदेह

धुळे : धुळे शहरातील पांजरा नदी पात्रामध्ये वार कुंडाणे शिवारात एका तरुणाचा मृतदेह पाण्यावर तरंगताना आढळून आला आहे. काल संध्याकाळच्या सुमारास या तरुणाने धुळे शहरातील मोठ्या पुलावरून उडी घेतल्याचे परिसरातील काही नागरिकांच्या निदर्शनास आले होते. आज सकाळी आढळून आलेल्या तरुणाच्या मृतदेहाची ओळख अद्याप पटलेली नाही.  

धुळे (Dhule) जिल्ह्यातील अक्कलपाडा धरणाच्या पाणी पातळीत वाढ झाल्याने धरणातून पाण्याचा विसर्ग करण्यात येत असल्याने धुळे शहर परिसरातून गेलेल्या पांझरा नदीला (Panjhara River) पूर आलेला आहे. नदीला पूर आला असताना शहरातील मोठ्या पुलावरून एका तरुणाने उडी घेतली होती. दरम्यान या घटनेची माहिती प्रशासनास देण्यात आल्यानंतर प्रशासनातर्फे त्याचा शोध देखील घेण्यात आला. परंतु अंधार पडल्यानंतर रात्री शोध कार्य थांबवण्यात आले होते. 

दरम्यान आज सकाळी पुन्हा एकदा या तरुणाला शोधण्यासाठी पथक नदीपात्रात गेले असता त्यांना धुळे शहरापासून काही अंतरावर असलेल्या वारकुंडाने शिवारात या तरुणाचा मृतदेह पाण्यावर तरंगत असलेला आढळून आला आहे. या मृत तरुणाची अद्यापही ओळख पटलेली नसून या संदर्भात पुढील तपास पोलीस प्रशासनातर्फे करण्याचे काम सुरू आहे.